يا كرار أموت و ما أعوفك

يا كرار أموت و ما أعوفك…يا كرار إمام الكون  أشوفك
ما أهتم يحيدر …لو ضلعي  تكسر

بيك  إحتار فكري إبيا وصف يبدي…يا سلطان روحي و مملكة  ودي
لأنك نظر عيني و أغله ما عندي…ما هزني الألم من إنسطر  خدي
يا كرار شوصفلك ودادي…يا كرار أظل للموت  أنادي
عهدي  ما تغير …لو ضلعي تكسر

تظل نغمة إشفافك تهمس إبسمعي…حنونه و من حنانك ماخذه  طبعي
دمعي  ما جره من إنكسر ضلعي…و من إخذوك للمسجد جره دمعي
يا كرار إلك دمعي جريته …يا كرار كسر ضلعي  نسيته
نارك  تبقه  تسعر …لو ضلعي  تكسر

و يالوجهك شمس تتلاله بالأنوار…يوم الما أشوفك حيلي بيه ينهار
من  قد  ما أودك يا علي الكرار…ما همني ضلع من صوبك  المسمار
يا كرار لجل حق الولايه…يا كرار أفوت إعله المنايه
حبك  يغله  أكثر …لو ضلعي تكسر

إبعمري  و  كل حياتي يا علي أفديك…و من تعطش إبدمعة ناظري  أرويك
إشكرت ربي و سإلته سالم إيخليك …و أحمده الصار بيه يا علي موبيك
يا  كرار إلك إفدي حياتي…يا كرار يروحي و أمنياتي
يا بو الحمله أثر …لو ضلعي تكسر

يا  أغله و أعز من النسيم الهاب…إهلالك يا علي بسماي أبد ما  غاب
قلت لك فدوه لك ضلعي لون ينصاب…و إلك فدوه الجنين الطيحوه بالباب
يا كرار إلك فدوه جنيني…يا كرار أضحي لك سنيني
حزنك  يبقه مصدر …لو ضلعي  تكسر

يحيدر  راح أموت و ينختم عمري…غسلني إبدموع إعيونك  التجري
شيعني إبتوالي الليل يا ذخري…و لا تتركني حته من أنزل  إبقبري
يا  كرار و حق الهادي أودك…يا كرار أمانه أطفالي  عندك
جرحك بعدي يكبر …لو ضلعي تكسر