يا علي عندي زلم كلها عزم

يا علي عندي زلم… كلها عزم … جت  كربله
حامت إحدود الخيم … دمها رسم … عقد  الوله
ترفض  العار…  عاشت  أحرار
دون  الأطهار…  أنطت  أعمار

هذي  يبويه  صحبتي أنطت إعهود إبنصرتي
عافت حلايلها و إجت غايتها تحرس  عيلتي
و  بيها  عله الكون أفتخر لا صحبه تشبه  صحبتي
فاضت مناحرها دمه و إتريد تسلم  رقبتي
قدمت  لجل  العهد … روح و جسد…  بالملحمه
إبكربله يالمرتضه… نالت رضه… رب السمه
صفوة  أبطال…  خاضت  أهوال
ثابته  إجبال…  إبوجه الأشرار
ترفض  العار…  عاشت  أحرار
دون  الأطهار…  أنطت  أعمار

أنصاري أنصار النبي هيه اللي حفظت  سنته
إشقد  فرق بين البايعت هادينه و اللي  غدرته
ذيج  إبطمعها للملك للهادي ميت  عافته
و  هذي يبويه إتمسكت إبطاها و كتابه و  عترته
آمنت أهل الوفه … بالمصطفه … و  ذريته
بيعتك  بيها  إلزمت… و إتمسكت… يا هل أته
صحبتي هاي… تطلب إرضاي
وقفت إوياي… وقفت  إيثار
ترفض  العار…  عاشت  أحرار
دون  الأطهار…  أنطت  أعمار

إتمنيت آنه صحبتي إبيوم السقيفه حاضره
ما  جان حقك تغصبه ذيج العصابه  الغادره
و  لا جان دارك تلتهب إبنار الضلاله  المسعره
و  لا جان ظالم يعتدي إعله أمي الزجيه الطاهره
يا علي لو هي إحضرت… جان إخمدت… نار الفتن
لو  إجت ضلع الطهر … ما ينكسر … يا با  الحسن
إبلوعه حسيت… إشقد تمنيت
حاضره  ريت … إبهجمت  الدار
ترفض  العار…  عاشت  أحرار
دون  الأطهار…  أنطت  أعمار

أنصاري أنصار الوفه أطواد و بهيئة  زلم
إشما تكثر إجيوش العده لا تجفل و لا تنهزم
إبصفين  لو هيه إحضرت ما جان تقبل  تحتكم
و  لو حضرت إبعصر الحسن ما جان يجنح  للسلم
للحسن محد وقف… وقفت شرف… من صحبته
بالعكس  يوم الشدد… عدها عهد … ما  حفظته
و عندي أصحاب… صفوة  أطياب
تنطي  إرقاب…  يوم  الأخطار
ترفض  العار…  عاشت  أحرار
دون  الأطهار…  أنطت  أعمار

لو  حاضر  الطف يا علي و إتشاهد أنصار الإبه
الكل منهم إبزوده برز و إيريد ينصر  مذهبه
ما  صافحوا جف الظلم بس صافحوا بيض  الضبه
كل قطره من دمهم جرت حاموا خدر آل العبه
ضاحكه  و متبسمه … بالموزمه… إبرغم العده
للمنيه إتقدمت… و إتوسدت… حجر  الرده
طاحت إجسوم… تنزف إدموم
و آنه هاليوم… وحدي  محتار
ترفض  العار…  عاشت  أحرار
دون  الأطهار…  أنطت  أعمار

أنصاري  ضحوا بالنفس و إعليها يشهد هالدهر
ويايه  وقفوا  بالشدد و نصروني إبدم النحر
من حقي إلهم أنتحب من حقي لو دمعي  إنتثر
هالصحبه  ما ألقه أبد إلهم مثل بين  البشر
من قبل أهلي نطت… دمها و ثوت… فوق  الثره
ما  على  دمعي عتب… لمن سجب… إلها و جره
آنه مهموم… حسرتي  إتدوم
أبجي هاليوم … خيرة أنصار
ترفض  العار…  عاشت  أحرار
دون  الأطهار…  أنطت  أعمار