يا شبيه المصطفه يبني عالدنيه العفه

يا  شبيه المصطفه….يبني عالدنيه العفه
عندي ما ظلت روح….اشلون أشوفك  مذبوح
يا شبيه المصطفه ….يبني عالدنيه العفه

جلمة حزن من جرح قلبي  تظهر
ابيا  عين أشوفك منذبح يالأكبر
تدريني عقبك عالصبر ما أقدر
يا غصن أحلامي الجنيته و أثمر
و قلبي لجلك منفجع….لو صخر هم  ينصدع
و داوي قلبي المجروح….اشلون أشوفك  مذبوح

يوليدي أمك بالخيم تنتظرك
روح إلها خليها تقبل نحرك
هالساعه آخر ساعه يبني  ابعمرك
ما  أظن تقدر عين ليله تنظرك
و طب الأكبر خيمته….ايودع اللي  ربته
و نادت ابصوت النوح ….اشلون أشوفك مذبوح

ودعها  لأمه  و طلع من صيوانه
ودع أبوه ابدمعته و  أحزانه
من  العطش  قلبه تشب  نيرانه
و عقب الموادع أسرع الميدانه
و  صوت أبو اليمه ارتفع….قلبي يوليدي انفجع
و  دمعي لجلك مسفوح….اشلون أشوفك مذبوح

و حسين يسمع صوت إبنه  المغوار
يرتجز بالميدان شبه الكرار
صاح  ادعي  يا ليله الشبيه  المختار
و قلب أمه وسط الخيمه يتلاهب نار
يا إلهي ابحق هلي….اوليدي الأكبر رده  لي
و  يا إبني عني لتروح….اشلون أشوفك  مذبوح

رد علي الأكبر لجن رد ابيا حال
نار العطش تلتهب وسط  الدلال
و  حسين شافه و الدمع منه  سال
اتعانق اويه الأكبر بمدمع همال
يالطلعت الحومتك….يبني شنهي  رجعتك
امخزن بقلبي اجروح….اشلون أشوفك  مذبوح

جاوبه الأكبر بويه قلبي  عطشان
بلجن  ترويني و تطفي النيران
جيتك ابلهفة قلب من  الميدان
و  حسين سالت دمعته امن  الأحزان
يبني ذوبني الحزن….هاك إخذ دمع الجفن
الفرقتك  روحي اتروح….اشلون أشوفك  مذبوح