وخلصت عالمشرعه اليوم روحي

وخلصت عالمشرعه اليوم  روحي
لاكفيل  ولا خيم…. وانه بعيوني  السهم
وخلصت عالمشرعه اليوم  روحي

زينب  بليلة الحادي عشر مصيوبه  بنظرها
وعلى  نار الخيم تمشي بكربله وتسحب  جمرها
((گطب)) وبگلب النوايب والفلك يسري  بأمرها
ماشاهدت  عين البشر… حرمه ولت بيد  الدهر
تمثل  لعد هاشم گمر… ترعى العيال بخطرها
حارس وماشافت النوم  زينب
ليلة  الحادي عشر …….. صاحت وصاح السهر
وخلصت عالمشرعه اليوم  روحي

ياختي  يام كلثوم هذا الليل هالچلچل  ظلامه
گومي نتفگد عيال حسين ونلم  اليتامه
وظلت  من الخيم خيمه وبيها لأبن أمي  علامه
والمرض حكم صفرته….. بگلبه يگص بچبدته
لوشاهد عيال إخوته… بلچه يتهنى  بمنامه
والعليل تحارب النوم  عينه
وهل بيته مذبحه……وبالمعاره مطرحه
وخلصت عالمشرعه اليوم  روحي

ما  تروع گلب زينب إلا من فگدت  يتيمه
وگفت  بصدر المعاره عگب ما گطعت  الهونه
وصاحت بصوت المصيبه راحت الطفله  غنيمه
ولجسم  أخوها توجهت….. تدرون ياناس  إشلگت
من  النحر والطفله اسمعت…. يالعلي والله  شهضيمه
من گطع راسك يامظلوم ((  بيّه))
إنت  سابح بالدمه… وانه صك عيني  العمه
وخلصت عالمشرعه اليوم  روحي

گومي  عن إبن أمي گومي حربة المصاب  شتچيده
مثل  رمح الطعن گلبه وگطت بگلبه  الحديده
لو مثل سهم المثلث لو مثل حزت  وريده
تدرين  چتاله الضمه….. وجثة أبوچ مخزمه
وضلوع صدره مهشمه…. وگاطع الجمّال إيده
خل  نلم جروحه ونگوم  عنه
لا  يوافينه الأجل…. وانگطع منه  الأمل
وخلصت عالمشرعه اليوم  روحي

گطعت الضنه من أخوها بت رسول الله  وحبيبه
مشت من هاي المصيبه وردت بذيچ المصيبه
للعليل وجسمه دامي وگلبه ما يخمد لهيبه
أمنت گلبه وأمنت… من شافته ويمه  إگعدت
وعين الغريبه لو بچت… حتى دمعتها غريبه
يابن  أخويه شعملت الگوم  بينه
والزلم راحت چتل…..وإنذبح حتى  الطفل
وخلصت عالمشرعه اليوم  روحي

هالله  هالله شلون ليله هزت الأرض  وسماها
من گلب مگيول زينب للسما يصعد دعاها
يا إلهي بدم أخوتي كربله إنصبغت تراها
ياربي ضحيت إخوتي… روحي ودليلي ومهجتي
ياربي درحم غربتي…. وشوف العيال  اشدهاها
وإنت ما تخفاك العلوم  يارب
من قبيل التضحيه…. تحفظ إلنه  الباقيه
وخلصت عالمشرعه اليوم  روحي