مَيْهمك اِتراضي افلان والأهم تِرْضي الزهره

مَيْهمك اِتراضي افلان .. والأهم تِرْضي الزهره

ابهذا النَهِج اِمضي ولا تِتعَجَب…يا سامعي لو شِفِت شَعرَك شَيّب
لا مو غريبه بس يظل الأغرَب
من تنسى بيدك الماس .. وتركظ تريد الجَمره

للزهره امضي وبالمصاعب لَتطيح…وهذا المثل يكفيني عَنِ التَصريح
سِد بابك ابوكت التجي يَمَك رِيْح
صَرصَر حَچيهُم مَوبوء .. اُو تِحمِل نوايا خَطره

الما يقدر ابفِعلَه إلك يُوصلَك…شيطانه يِغويه اُو يِريد اِينَزلَك
اِترَفَع اِنته اُو خَلي هاي اِبعَقلَك
قابيل حاسِد هابيل .. اُو قيس اعله هاي الفِكره

عُوف اليريدك تِلتهي اِبقيل وقال…اِثبِت ولو كل آدمي اِگبالَك مال
اِيوَصْفَك صَغير الشافك اِبراس اِجبال
بالخدمة شانك مَرفوع .. اُو غيرك سجين اِبحُفرَه

كل واحد ابدنياه عنده اهمومه…خل هَمَك انته اعله گِضَت مظلومه
اِعقِد مجالس وابچي عالمهضومه
وِاعلِنها جدام الناس .. لا تخشى راي الزُمرَه

يا حسرتي للزهره لا لا اتهيدين…عالماتت او مكسور منها ضلعين
مدفونه يا ويلي اِبأثر حُمرة عين
اِبسابِع سِمه والمُختار .. اِيشوف ابوجِهه السَطرَه

هاي الوديعة اِستُرجِعَت يالمختار…وِاعله الظُلمها يِبدي حُكم الجبار
اِيجازي العِصَرها والي وَجْ باب الدار
بالنار يِصليه النار .. ابگاع الجحيم اِيعُصرَه