للطف وصلنه جاوين أهلنه

للطف وصلنه …جاوين  أهلنه
عالترب  عفناها إبدور …جينه و لقيناها  إقبور
خيبوا  أملنه …جاوين أهلنه

إكشف  إتراب اللحد يحسين و قوم
إختك و إجيت إمن اليسر أشجي  إهموم
محد يحس بالولم غير المالوم
و ما يعرف المظلوم غير المظلوم
و عنكم مشينه …ابهاي  الضعينه
و ردينه تدري ابيا حال…بس الحرم و الأطفال
و لا والي إلنه …جاوين  أهلنه

يحسين بصوات الحزن ننخاكم
لليسر  و إحنه صرعه خليناكم
مثل  البدور  إعله الترب  عفناكم
شنهو  السبب  ردينه  ملقيناكم
وين  الأهل وين…جاوبنه  يحسين
ما واحد امن الأكرام…يتلقه ضعن  الأيتام
و محد سإلنه …جاوين أهلنه

للطف وصلنه و زاد بالطف  همي
و شفت اليتامه إتفرقت من يمي
واحد  أشوفه فوق قبرك مرمي
وواحد  ينادي وين دفنوا عمي
و ضجت الأيتام …من جور  الأيام
ما بين القبور إتحوم
تحسب مصايب و هموم
و رجعت إبلنه …جاوين أهلنه

يحسين من إتفرقت  أيتامي
إتذكرت  من  حرقوا القوم  إخيامي
وواحد إمن أطفالك طلع  جدامي
للمشرعه  و ظنيت قلبه  ضامي
و لمن تبعته…يصرخ سمعته
و طاح إعبه قبر  العباس
يشجي  له من جور  الناس
و قربوا أجلنه …جاوين  أهلنه

قبر الجفلني شفت طفلك يمه
إيعفر إخدوده بالقبر و  يشمه
إضلوعه حناها إيعاتبه و  يحشمه
كل ظنه من اللحد ينهض  عمه
و  خابت  إظنونه …و إنخطف لونه
و    آيس    رجع   لينا    إردود
جي ما نهض راعي  الجود
يصرخ  طفلنه …جاوين  أهلنه

هالعيله  ضجت و إنت تعلم  بيها
ما  عندها غيرك سند يا  واليها
إبهذا الوضع يحسين لتخليها
إنهض و يم قبر النبي وديها
و  هالعيله تنخاك…و إتعنت  إوياك
من  غربه  تصرخ و إتنوح
و    باصرنه    لاوين    إنروح
و  هاجت عللنه …جاوين  أهلنه