كل مسلم إبها اليوم مثلك صبح مظلوم

كل مسلم إبها اليوم …مثلك صبح  مظلوم
و  الغدرته الكوفه…إبكل موطن  إتشوفه

ما  أشبه  اليوم بأمس ما أشبه الحالات
ما  أشبه  أيام العمر و الزمن و  الساعات
كل  جيل  أطباعه مثل جيل المضه و الفات
و  كل نكبه تمضي و تنولد منها سبع  نكبات
دنيانه  يا مسلم غدت مشحونه  بالآهات
كل بقعه من وجه الأرض ما تخله من  مأسات
ابكل بقعه صرنه إنشوف…جور و هوان و خوف
و العايش إبخوفه …إبكل موطن  إنشوفه

جولة الحرب الداميه موجوده من  إزمان
من  زمن  قابيل إبتدت و إبتدت  بالخوان
و الجاهليه إستارثت هالغدر و العدوان
شنو حرب ضد النبي عبادة  الأوثان
و  من  بعده ذبحوا عترته و شافت هضم و  أحزان
و إنت يمسلم هم شفت ضيم و جفه و  خذلان
و  الصافحوا إيديه …بالكوفه غدروا بيه
و المسلك إجفوفه…إبكل موطن إتشوفه

يا  مسلم  إبدرب العدل أصبح إلك تذكار
للكوفه لمن أرسلك ريحانة المختار
آلالاف  إجت  و إتبايعت قالوا إلك أنصار
بسما  طلع وجه الفجر عكس التريده صار
كل ظنك اللي بايعوا بالكوفه ناس  أخيار
ما يخطر إبالك أبد هالمجتمع  غدار
و  الوادم  الضيفوك…هم الذي غدروك
و اليغدر إضيوفه …إبكل موطن  إتشوفه

أرباتعش قرن إنقضه من عامك  الهالعام
فلك  الزمن جن ما مشه و لا دارت  الأيام
نفس  الظلم نفس الغدر شفنه غصص و  آلالام
من جاهلية هالوكت عبادة  الأصنام
عادوا  أساليب الغزو و الظلم و  الإجرام
و غير السجون المظلمه و الأسر و  الإعدام
و  بكل زمان ينعاد…هالظالم إبن إزياد
أوصافه معروفه…إبكل موطن  إتشوفه

قائدها بالكوفه جنت لنك صرت  مغدور
نفترض ذاك المجتمع جاهل عقل مغرور
إحنه شجانه ابها العصر و إخضعنه للمأجور
و  عصر التجارب و العلم و يتسمه عصر  النور
عزنه  العلم  للأجنبي و بالجهل صرنه إندور
و المسلم اليملك شيم ميصافح أهل  الجور
ما يقبل الإسلام…نقضيها  بالأوهام
من  هاجوا إحروفه …إبكل موطن  إتشوفه

من جيلك الهذا العصر تتشابه الأجيال
يا  مسلم و صرنه بأشد و أعظم و أصعب حال
نحجي و حجينه إبلا فعل و شتنفع الأقوال
يا  ما تعبنه للخصم تتسرب الأموال
إندم الدجل و أهل الدجل و إنصافح  الدجال
و صرنه العلم نستورده من مجتمع  جهال
و راعي العدل ميصير…يقبل ابها  التأخير
أطباعه  موصوفه …إبكل موطن  إتشوفه

راعي  العدل  ما يرتضي إيبايع شخص  سفاح
و أهل العقيده الساميه للحق تبيع  أرواح
مثلك يمسلم من هتف صوتك و بالحق  صاح
هالصوت صاخب بالدهر و إينادي  للإصلاح
لجل الرسالة الطاهره دمك الطاهر  ساح
و كل قطره من دمك شمس و بكل جرح  مصباح
شهروا عليك إسيوف…راعي الغدر  معروف
ما  يغمد إسيوفه …إبكل موطن  إتشوفه