عشت أتنطر إوليدي

عشت  أتنطر  إوليدي…راح إبني علي من  إيدي
بقيت إمحيره بأمري…غريبه و دمعتي تجري
راح  إبني علي من  إيدي

مل  الصبر  مني و جزع و إتنطريت  الوالي
و ربيته بدموعي و ألم و إتمرجح  إبدلالي
و  قلت السهر فدوه التعب يرخص العين الغالي
و أحلم يوفيني الربه و يتحققن  آمالي
كبر بدموعي و الونه …علي هيبه  أشوفنه
و  رجعت أتفكر إبصبري…غريبه و دمعتي  تجري
راح  إبني علي من  إيدي

وي روحي إتوازه الحزن و الزم صبر  دمعاتي
و أختنق مره إبعبرتي و مره ألتهي  إبحسراتي
لمن وصلت الكربله عاد الدهر  حسباتي
آمالي  و أحلامي إنطوت و إتغيرت غاياتي
أشوف إموادع و لوعه …و حرم و إعيال مفجوعه
و أشوفن من بعد خدري…غريبه و دمعتي  تجري
راح  إبني علي من  إيدي

و  لن الربه إبحضن الوفه شد و نوه إعله  الفرقه
إيودعني  و يقلي إنتهت ما ظل أمل  بالملقه
شفت إبني شمعة ناظري يمشي و منيته  إتسبقه
قلت له يا الأكبر لو رحت مثلك بعد وين  ألقه
صحت يوليدي لا تمشي…يروح إبروحتك  كلشي
مشيت  إبحالي ما تدري…غريبه و دمعتي  تجري
راح  إبني علي من  إيدي

راح و مشه إوياه الخدر و العمر و آمال الروح
و  إحضنت قلبي الما هجع مذبوحه تحضن مذبوح
و إعيوني ما هملن دمع يتقاطرن نزف إجروح
و  ناديته ليش إبكربله إتعوف أمك و عنها إتروح
تعوف الوالده إبحيره…يا رابي إبمنبع  الغيره
ليش  آخر صبر عمري…غريبه و دمعتي  تجري
راح  إبني علي من  إيدي

لو بيدي للحومه أعتنيه إبني و أريد أمشي إوياه
و  سهم  اليصيبه إبمهجتي إبصدر المحنّه  أتلقاه
و  خليني  أطيح إبحومتك بس لا يغمضن عيناه
سلوة  حياتي و فرحتي و بعمري أريد  أتفداه
شلي  إبديناه من يرحل…و بعد يا فرحه  أتأمل
حِنه  ضلعي و كسر ظهري…غريبه و دمعتي  تجري
راح  إبني علي من  إيدي

اشسوت  ابحالي  كربله و خلت وضعنه إبيا  حال
لا من زلم لا من وطن ظلت حريم و  أطفال
و  اشلون أفكر بالضعن باجر إذا عنهم  شال
و  اليحدي يا هو إبناقتي و يا هو الصير الجمّال
عليه الناس تنشدني…شقولن وين عفت  إبني
و أعاود من بعد يسري…غريبه و دمعتي  تجري
راح  إبني علي من  إيدي