عدكم دليل امودعه

عدكم  دليل  امودعه …. هاي البتول البضعه
لا  تهضموها …. لا تبغضوها …. هاي البتول  البضعه

ليلة وداعه المصطفه أصحابه شيوصيها …. جانت وصيته ابفاطمه و يدري شيصير اعليها
قلهم يأذيني تره من رايد يأذيها …. و قلهم يعاديني الذي يبغضها و يعاديها
و  اليلتزم طاعتها …. و يتمسك  ابعترتها
خل ايتهنه …. بروض الجنة…. هاي البتول  البضعه

ودار البتول ابكل وكِت يوقف الهادي اببابه …. يهدي السلام الفاطمه و جانت تسمعه أصحابه
يا أم أبوها الطاهره يا أعز كل أحبابه …. يا رحمه من رب العرش و سر قدرته و اكتابه
لو رايد ايشاهدها …. يطلب اذن من  عدها
يخجل منها …. يستأذنها…. هاي البتول البضعه

و ليلة الودعها الأبو و الزمن خيب ظنها …. و السمعوا اشقال النبي و اشكثر حدّث  عنها
انقلبوا  أذياب ابغيبته و فاطمة انتقموا منها …. منعوها من هل الدمع و ابقلب حبسوا  ونها
و بلا ذنب ظلموها …. و حصت فدك غصبوها
لنها ابحسره …. أم العتره…. هاي البتول  البضعه

السمعوا وصيت المصطفه بغيابه ما حفظوها …. و باب اللي يطرقها النبي همَ ابحقد  دفعوها
و دار اليدخلها بأذن و بلا أذن دخلوها …. للستر لاذت فاطمة و اتجاسروا  عصروها
سمعوها لمن صاحت …. شافوها لمن طاحت
ابلوعه  اتنادي …. بت الهادي…. هاي البتول  البضعه

متأثره  ابكسر  الضلع و موقف علي الأثرها …. من عدها حاشه يعتذر و بهالوضع ينظرها
للمسجد  اتنادي اعتنت و لن قنفد ايعيرها …. يشتمها و بجفه غده فوق الوجه  يصطرها
رجعت حزينه ابهمها …. يجري دمعها و دمها
و  الوالدها  …. تشكي العدها…. هاي البتول البضعه

بالليل  تبجي أم الحسن قصدت قبر والدها …. تشتم اترابه اتعاتبه و تشجي له ضيم العدها
فوق  الضلع  كسر القلب جرح الهضم ضاهدها …. فاطمة الجانت سلوته ريت النبي  ايشاهدها
لمن سقط محسنها …. ما هودت من ونها
ما رحموها …. ولا حشموها…. هاي البتول البضعه