ضلع المهشوم

ضلع  المهشوم …… نحر المظلوم …… يالمهدي
جبد المسموم …… قبر المهدوم …… يالمهدي
و  إنت اشتختار …… تطلب يا ثار ……  يالمهدي
*
مثل هالليلة جف الموت مسح وجه الرضه  جدك
قضت بين الذبح و السم يغايب كل أهل ودك
اشكثر يا ما إلك ثارات رهينه و تنتظر  وعدك
مراقدهم  غدت  أطلال و انت ابغيبتك  بعدك
جدك مطبور …… شبله المنحور ……  أجدادك
ضلع  المكسور …… تهديم اقبور…… أجدادك
توقف محتار …… تطلب يا ثار …… يالمهدي
*
الدهر أردف عليك اهموم بدت من أمك  الزهره
و تفجر جفنك ابمدمع مصبه من دمه  الطبره
بعد سم الحسن عمك و ذبيح الهشموا  صدره
مصيبة  جدك  السجاد بالسم انختم  عمره
الباقر  سموه …… الصادق أردوه……  عدوانك
الكاظم سجنوه …… شبله الغدروه…… عدوانك
من  الأشرار …… تطلب يا ثار……  يالمهدي
*
الخوارج  خرجوا امن الدين عليكم صبو  النقمه
بدوها  ابطبرة الكرار بدت تستفحل  الأزمه
أميه  ما دعت إلكم نحر ما حللت دمه
تولوكم بني العباس سجون الموحشه  الظلمه
الكاظم  مسجون …… شبله المرهون…… يا  الغايب
جبده  المطعون …… ابسم المأمون …… يا الغايب
ابفقد  الأطهار  …… تطلب يا ثار…… يالمهدي
*
مثلما  راحوا  أجداك ضحايه ابنايبات السم
الرضه  استقبل  نذير الموت و تقطع جبده و  اتخذم
يغايب  من تمر ذكراه ضميرك يبدي  يتألم
تروح اتزوره بالدمعه و تطوف اعله القبر  بالهم
نار المأسات …… موج العبرات…… تتعنه
اتجر الحسرات …… ابجمر الآهات ……  تتعنه
تخمد  يا نار …… تطلب يا ثار……  يالمهدي
*
إلك  بدموعي  يا لغايب أوضح للحزن صوره
إذا  تقصد  لعد جدك الرضه و للمرقد  اتزوره
تشوف  المرقد الزاهر يشع من عالبعد  نوره
و قبر جدك و أبوك اليوم صفت أطلال مهجوره
يبن الضرغام…… اقبور الأكرام…… هدموها
بإسم  الإسلام …… أهل الإجرام……  هدموها
اتحير الأفكار …… تطلب يا ثار…… يالمهدي
*
النواصب عالحقد عاشوا بين الباغي و المرتد
خوارج خرجوا امن الدين جرايمهم غدت  تشهد
بإسم دين النبي اغتصبوا و ذبحوا طلعوا امن  الحد
ابحياته الوالدك سموه ابمماته فجروا المرقد
اكَبور الأطياب …… ابدافع إرهاب……  فجروها
و  انريد إجواب …… شنهو الأسباب……  فجروها
يبن  الأخيار …… تطلب يا ثار……  يالمهدي
*
إذا بالطف شمر واحد قطع من السبط منحر
ألف  مثل الشمر عدنه و بعد يبن الحسن  أكثر
إذا واحد إبن ملجم طبر راس الوصي حيدر
ابعصرنه  اشجم إبن ملجم مراقد هدم و  فجّر
زمرة أرجاس …… ذرة إحساس…… ما  عدهم
قطعوا جم راس …… خوف اعله الناس…… ما عدهم
من  هالفجار …… تطلب يا ثار……  يالمهدي
*****