زينب تنادي وتسچب لعبره والحزن چاسيها

زينب  تنادي …. وتسچب لعبره والحزن  چاسيها

أوچبت  زينب على التل تنادي….. وين الضياغم
رجّت بحنها والنحيب الوادي ….. والدمع ساجم
وين التحامي مخدرات الهادي….. وين الهواشم
زينب  تنادي…. وين إخوتي المايندرس  ماضيها

شما حشّمت ماواحد من إخوتها……. مسرع لفاها
عونچ يلبّيها ويرد لهفتها……. ويبطل  بچاها
للمعركه  تعنت تهل دمعتها….. ومعلن  نداها
زينب تنادي…… ومنين إجتنه كربله و  واديها

حنّت  وشبچت على الراس العشره …. بوسط  المعاره
وتجلّب جسوم الخذم عالغبره…… ودمها يتجاره
وتنادي  وينك ياعزيز الزهره….. ماتم لي  چاره
زينب  تنادي…. يحسين دگعد لختك  وحاچيها

من شاهدت جسم الحسين موذّر….. وذرة وذره
بحد الصوارم وبدماه معفّر…… مهجة الزهره
وصدره بحوافر خيل أميه مكسّر…. صاحت بعبره
زينب تنادي…… يحسين ليش بجثتك  موذريها

طاحت  على جسمه وتحبه بنحره…… وگطعت الظنه
شاهدت دم طبره يصك بطبره……وأيّست منه
ودعتك  الله  يا چتيل العبره…… صاحت  بونه
زينب تنادي……. يحسين عيني من البچه  لعميها

تنادي يخويه وبالترب تتوارى…… بيك  إفجعوني
ياريع گلبي ويا نمير أثماره….. ياضوه  عيوني
بديرة غرب وبهالحرم محتاره…. لا تخلوني
زينب  تنادي….. ماتنتهض لعيالك  تحاميها

بالليالي  عيون هاشم چي تنام…والمنازل نشرت سود  الأعلام
لو  عماها  السهر أبدا ما تنام…والحزن كل جيل زاد  بجيلها

جيل عن جيل الحزن عدهم يزيد…لا يملون ومسوا يصبح جديد
ما  يطيب الجرح نوح ولا يهيد…لو دموع العين دم  تسيلها