دهري حنه اضلوعي

دهري  حنه  اضلوعي …. و ما نشفت  ادموعي
صوتي  اعتله من كربله …. من كربله صوتي  اعتله

زين  العابدين آنه ابويه المنذبح  ضامي
و  من  تنشدني عن حالي تهيج جرحي و آلامي
اجروحي لا جرح و اثنين تنزف و القلب  دامي
رمتني  النايبه ابجبدي و بالطف جارت  أيامي
صبري  مرد روحي …. و ما طابت  اجروحي
مستأصله  من كربله …. من كربله  مستأصله

عن  يا جرح تنشدني و عن يا محنه يا  لوعه
عن  مذبح  ابويه احسين لو عن سحقت  اضلوعه
آنه  اللي شفت عباس عمي اجفوفه  مقطوعه
و شفت الأكبر امطبر و جاسم طفوا  اشموعه
لا لا تلوموني …. لو هلت اعيوني
اتظل  سايله من كربله…. من كربله إتظل  سايله

شجاوب آنه هالحاير يالرايد خبر  تسمع
مذابح شفت بعيوني من شبان من  رضع
ابويه  و  سهم لبجبده من ظهره صبح مطلع
اشلون ايلطع المثلث جبده اويه السهم  يطلع
يصهل  رجع مهره …. امخضب ابدم  نحره
هالمعضله من كربله …. من كربله هالمعضله

علينه  حرقوا  اخيمنه و نار الفاجعه تلهب
و  أشوف  اخيامي تتوقد مثل جمرة قلب  زينب
العماتي  و  خواتي انظر خدرهن أصبح  امسلب
سلب  و رعب خيل و نار و اعدانه غدت  تنهب
عالناقه  ركبوني …. اويه الحرم  جتفوني
شفت  البله من كربله…. من كربله شفت  البله

أخذنه روس أهالينه و ظلت عالثره  أجسام
و فوق ارماح نصبوها آه يا عملت  الظلام
وصلنه الديرة الكوفه و نظرات الشماته  اسهام
و تتصدق علينه الناس اشلون اندارت  الأيام
آنه علي السجاد …. أدخل عله ابن  ازياد
اويه  العايله من كربله من كربله اويه  العايله

رجعت امن اليسر للطف و درب النايبه  اقطعته
ابويه  آنه احفرت قبره و بيدي ابلحده  نزلته
و  طلعت  السهم بيدي اعله صدره طفله وسدته
اعله صدري الأكبر احضنته امقطع جسمه و  ادفنته
متعفره  الأبدان …. لا غسل لا  أكفان
ابداري الفله من كربله …. من كربله ابداري الفله

امن الكوفه رحت للشام و شفت الشام عدهم  عيد
آنه و عمتي زينب مجتوفين ايد بأيد
الصوت ايوسم ابمتني و دمي ايسيل من الجيد
ماولدتني  ريت أمي أسير و لا يراني  ايزيد
و  زينب عقب عباس …. تنظر عليها  الناس
متوجله  من كربله…. من كربله  متوجله

سني ما ضحك فد يوم عقب الأهل و  الأنصار
و ظلت علتي ابقلبي و أطفي نار قلبي  ابنار
الفواطم  ما  عليهن ظل و لا هن قعدن ابظل  دار
لمن آخذ ثار احسين منهم عمي  المختار
و المرتضه لازمني …. و الأجل  داهمني
قلبي  انسله من كربله …. من كربله قلبي  انسله