دار الخيم هاي چا وين أهلها

دار  الخيم هاي چا وين أهلها…. وعيال الحسين وين  الكفلها
وحرگ المخيم بالگلب…. شيطفي ناره
وما تنشف العين من دم الحسين

چني اتصور مصيبه فجعت گلوب  العوالم
حرم  ردت من ظليمه من حدر كابوس ظالم
وصرخة الأيتام صرخه هزت گبور  الهواشم
وجسوم أهلها تضطرب… بگبورها تحيي  الندب
ياعيال المعاتب صعب….. عظم ماظل بينه  سالم
بت  فاطمة تصيح هاي الضعينه….. من الكوفه والشام عوّد  سبينه
وبروسكم متعلگه گلوب  اليساره
وما تنشف العين من دم الحسين

چني اتصور عقيلة حيدر تمثل  كرامه
مثل ما جدها محمد فيّت عليه الغمامه
زينب بگلب المحنه خيمه چانت عاليتامه
زينب لخوتها تمثله…. خيمه على روس العايله
وترعى  الطفل وتدلله…. وهاي للخوه علامه
وكل  ساعه وتصيح ياهل المصيبه…. بالحرم تدرون ظليت  غريبه
لا تخلوني محيره سوولي چاره
وما تنشف العين من دم الحسين

زينب بوحشة الدار محيّره وتلطم بديها
وبالأرامل  واليتامى شافت المصرع وليها
تصيح يابن أمي حرمكم جارت الدنيا  عليها
چانت عزيزه مخدره…… بحماك يا نعم الذره
عگبك خذوها ميسره….. وبالحبال  مچتفيها
ما تگعد تشوف حالة عليلك…. إي وحگ سهم الگطع  دليلك
مكسور  گلبك وأثر بگلبي إنكساره
ما تنشف العين من دم الحسين

وللرضيع  حضنت گبره للرباب  تصورتها
نبله الحزت وريدك ياولدي بگلبي زرعتها
لليسر وياي راحت وصوغه لك هسه  جبتها
بالنبله دلالي إبتله….. وچانت لچبدي تمثله
أحا يا نبلة حرمله….. فوگ سبيي  تحملتها
شذنبك يا عطشان والسهم وافاك…. وبچف الحسين يتفايض دماك
لليوم  من دم رگبتك دمعي  يتجارى
وما تنشف العين من دم الحسين

وانحنت ليلى على گبر الأكبر وتجذب الحسره
وافتك طبرة الأزدي هالله هالله شلون  طبره
كل  جريح  السبگ مهره يرده للصيوان  مهره
لعداك مهرك سلمك…… وخله الرماح  تخزمك
وخله  السيوف تجسمك…. وصطر وجهي شلون  صطره
چتفني  بحبال دهري وزماني…… وللكوفه والشام عگبك  سباني
وظليت  انازع باليسر واجرع  مراره
وما تنشف العين من دم الحسين

چني اسمع صوت رمله تصيح يا عريس يابني
ومن چنت اعجن الحنه گلبي بمصابك لسبني
وباللحد ذبك زماني وآني للشامات  ذبني
والدهر طفى شمعتك… حناك من دم  رگبتك
وعالغبره صارت حوفتك…. وسلبك مني  وسلبني
ردتك  بصيوان  تتهنى نفسك….. وبيدي أحنيك واوگف بعرسك
وگفني  دهري ميسره بقصر  الإماره
وما تنشف العين من دم الحسين

چني اسمع صوت زينب ضاگت عليها الوسيعه
وياي  للعباس گومن يالفواطم  للشريعه
گبل ما نوصل لگبره دورن چفوفه  الگطيعه
زينب على گبره هوت….. مثل الحسين  تخوصرت
وبصوت غربتها صرخت…. ياعباس آنه  الوديعه
بوجودك  الناس تتمثل أمري….. يالدللتني وعمرت  خدري
وخدري البنيته بكربله تهدم عماره
وما تنشف العين من دم الحسين