حلو حلوه دورة البعيونك

حلوه  حلوه  …دورة البعيونك
حلوه  حلوه  …و كلهم  إيحسدونك
شامت  الفوق الوجن…زادت الحسنك  حسن
حلوه  حلوه…  و كلهم  إيحسدونك

فوق  خدك  سجد ياقوت  الوجود
و بحّماره لوّن إخدود  الورود
لا محيط إيحيط حسنك لا حدود
حصنك  ربك  من إعيون  الحسود
إبممكلة أهل الحسن حسنك يسود
غالي  غالي …إنت يا  مهدينه
غالي  غالي… و حصّنك  بارينه
هالطلاسم  و  الحصن…زادت الحسنك حسن
حلوه  حلوه…  و كلهم  إيحسدونك

يا  أمير الحب فريضه  إمحبتك
إتغار  خطوات  الرشه من  مشيتك
بالمسك ميصير أوصف  شامتك
نقطة البسمله شامت  وجنتك
أوحد و محد تملك هيبتك
آيه آيه …إمطرزه إعله  إشفافك
آيه آيه… نزلت  بأوصافك
كل  تراتيل  اللحن…زادت الحسنك حسن
حلوه  حلوه…  و كلهم  إيحسدونك

ياللي  وجهك مكه و الشامه حجر
بيها طافت محرمه إقلوب البشر
وجهك  القرآن و إعيونك  سور
الرمش  عينك سجدت إعيون  الدهر
يا ختام العصمه يا رابع  عشر
مهدي  مهدي… و للشيم  حاويها
مهدي  مهدي  …و للبشر  تهديها
و  كل هدايه تنعلن…زادت الحسنك حسن
حلوه  حلوه…  و كلهم  إيحسدونك

دانيه إبوجه إبن يعقوب القطوف
إمن  الغواني  قطّع إبحسنه الجفوف
وين يوسف خل يجي إبعينه و  يشوف
إسهام  رمشينك و الحواجب  سيوف
عالعواذل  عينك إتسدد  حتوف
جنه  جنه…  و الوجه رضوانك
جنه  جنه… إتفاوحت أغصانك
بيها كل زهرة غصن …زادت الحسنك حسن
حلوه  حلوه…  و كلهم  إيحسدونك

يالجبينك شمس و الحاجب هلال
إبمسجد إخدودك سجد وجه الجمال
رمشك  الساحر صبح مضرب  مثال
عله  إقلوب  أهل الحسد ينثر نبال
إبوصف  معناك  إكتمل معنه  الكمال
يزهي يزهي… وجهك  بأوصافه
يزهي  يزهي …و هام كلمن  شافه
و الفتوره البلجفن …زادت الحسنك حسن
حلوه  حلوه…  و كلهم  إيحسدونك