تهلهل والمدامع زينب تهلها

تهلهل والمدامع زينب تهلها …. تگله هنا يبو فاضل بعد  شلها

بعد شلها تگله وبدمع سچاب … إلي وياك خويه مناشده وعتاب
إنت  النوختلي الهودج على الباب … وگمت بشيمتك ياحد  مراجلها

يا حد المراجل يا عجيد وعين … يا بدر الهواشم ضنوة الماضين
تعدل  هودجي  والرسن بيد حسين ….. هذا ونجل ابو طالب مناهلها

مناهل  من  عقيل وحيدر وجعفر … شبلهم ويشب نيران الحرب لو  كر
يطر سيفه الثبت والرمح ذب الفر ….. يحوم على السرب كلها  ويجندلها

يجندلها وعذاب الخيل يوم الكون …. جيت من المدينه شلون جيت  شلون
بالعز والهواشم بالضعن يحدون …… بهيبه والحرم كبر هلاهلها

هلاهل  وختك بهودج وبيه حراس ….. تقبل شيمتك زينب مهبطه  الراس
يا  عباس ابو النوماس يا فراس …. اصيد يالتصيد الصيد يا  صلها

يا صلها تصيح بصوت عالي صوت …. يا فاعي ياحوت الحوت يا  منعوت
هذي الموت اخوي ولا يهوله الموت …. چي ياموت خدركم يگع ظلها

يگع ظلها يبوفاضل عليك يهون …. ياطير المنايه وسخط يا  طاعون
يا سگم العدو يا ساس يا مدفون …. يا سم الذي چتال يا  سلها

يا سل الخصم من الرواسي طود … يا مفتود يا فتاك ماضي  حدود
وين  العهد يا راعي العهد مريود …. هذا الشمر والحادي حده بلها

بلها أگبلت للعيله وغدت رنه ….. ياصنديد يالمطرب على  الدنه
آخر كون ما تنشد محاملنه …. وين اللي يشدلها ويعدلها

يشد  الها ويعدلها ويشد حزام …. چيف تنام يالمرهب عدوك  نام
عنده ايتام يا وهام درب الشام …. وين الي يرچبها  وينزلها