بالطف يريد حسين عرسك يجسام

بالطف يريد حسين …عرسك يجسام
عرس الفدائين …عرسك يجسام
زفه و من غير إشموع…و الحنه دم و إدموع…عرسك  يجسام

أعاين  طولك ووجهك يالمدلل…غصن يحمل قمر قادمي  يتمثل
يوليدي الزفاف إيريد له محفل…و عرسك حلته تحت السيوف إتظل
منك الروح إتقول …تحرمني  ليام
من وجهك و هالطول… تحرمني  ليام
وجهك  بالدم إيغيب …يفجعني بتالي الشيب…عرسك  يجسام

ضامي  إقبالي إنت يا غصن دنياي…و الوردة شبابك ما يصح  الماي
حط راسك حبيبي فوق صدر إضماي…خلي إيبلل إشفافك دمع عيناي
عين أمك إبهالليل… سهرانه  متنام
و  عين القدر و الخيل… سهرانه  متنام
إيزفوك الخط النار …هيج إتريد الأقدار…عرسك  يجسام

بدر  يوليدي كلمن شافك إبوصفك…و كواكب هاشميه طلعت  إتزفك
طف حسين يبني هذا هم طفك…و منه إتريد حنه إمعطره الجفك
حنت  زفافك هاي …من منبع الهام
ما تنعجن بالماي… من منبع  الهام
لو  بالدم إتحنيت …يوليدي إنت إختاريت…عرسك يجسام

غريب  إنت  و غريبه بالطفوف أمك…و يريد القدر يحرمني و  يحرمك
يبني إنت الهوه اللي روحي تشتمك…و إشلون إمن أشوفن حنتك  دمك
إنت كريم الروح …يا نسل لكرام
للطف إتظل مجروح …يا نسل لكرام
رايد  هالزفه إتدوم …هيجي إيريد المظلوم…عرسك  يجسام

قلب  الضاميه  يبني إعليك كل خوفه…أدري هالقدر حضر لك  إسيوفه
و أدري للمنيه إتزفك الكوفه …يا عريس حنه إبطبرته  إجفوفه
يبني  ابقلب عطشان… تتحده  ظلام
تسحق وجه الميدان… تتحده  ظلام
شاد  إبصرحه أبطال…و إتريده للأجيال…عرسك  يجسام

يبني إتعود لي و بهامتك طبره…عريس و تحني إبدمك  الثوره
يحملك عمك و صدرك على صدره…إيغطي إجروحك اللي تنزف إبصبره
جايب لي يبني مصاب… ترجع للخيام
كل جرح دم و إتراب… ترجع  للخيام
عريس  من الميدان …جايب لأمك أحزان…عرسك يجسام

ترجع و الجروح إقبالي أخليها…بيش أغسلها من إتراب العليها
تدري كل خيمنه ماي ما بيها…يا جمره إبمصابك يبني  أطفيها
عريس     و     لأمك     جاي…    يوليدي     لالام
و  شتحمل روحي هاي …يوليدي  لالام
وشظمت لي الأيام …من بعدك يا آلالام…عرسك يجسام