ارد اگعد بباب الصحن

ارد اگعد بباب الصحن … مثل اليگدي  اگدايه
و أشجي لبو فاضل محن … و أحبابي تشجي اويايه
عباس عباس عباس يا  عباس

أقعد  على بابك يمن باب الحوايج  بابك
أجري  الدمع  يا با الفضل لمصيبتي و  امصابك
جمرة مصابك ما طفت من احرقوا أطنابك
و  خيمة دليلي ابفرقتك حرقتها نار  اغيابك
من  يا هضم يا با الفضل أفتح دليلي و  أحجي
لمصيبتك لو فرقتك أعتب عليك و  أبجي

جان المحب ابمرقدك يعرض الك أشواقه
أصبحنه  بديار  الغرب نحمل اهموم  افراقه
يا الغالي بالغربه و لون شخص ابشخص  يتلاقه
اتسالمه  و اتودعه ابحسرة أمل حراقه
و  حين اليودعه ايأمله و بأمنياته  يصبره
باجر  نرد يم الأهل و هم نلتقي  بالحضره

اويا ما على هذا الأمل بالمهجر اتواعدنه
لجن يعاكسنه الدهر و المرقدك ميردنه
أعظم  مصيبه بالغرب أطفالنه  تنشدنه
ليش  احنه  بديار الغرب بويه وطن ما  عدنه
و  شنجاوب الطفل الذي يرضع قهر بالغربه
و  يسألنه  ما عدكم وطن صعبه يغالي صعبه

يسألنه و انقله ابدمع يجوي المحب  نيرانه
عدنه وطن و أقدس وطن ربنه الكريم  إنطانه
موطنه  ربنه امكرمه حين الجعل  بحضانه
أجساد أيمه طاهره و بيهم زهت  دنيانه
بيهم  أمانينه زهت بالآخره و  بالأوله
و  كل القلوب امن البعد بودادكم  موصوله

و  حبل الوصل ما ينقطع رغم البعد و  الهجره
منك  جسدنه لو بعد أرواحنه  بالحضره
كلما  يجي  لينه شخص من مرقدك و  انظره
نستقبله  و انقبله و انظم صدرنه  الصدره
ابلهفة  بعد نستقبل القصدونه من  أحبابك
و انشم يبن حيدر علي بثيابه عطر  اترابك

نستقبل المنك يجي يا بو المراجل  لينه
لجن و لا منك خبر بالطف وصل لسكينه
نادت  يسبع  القنطره يا عمي وعدك وينه
ما تدري جسمك عالنهر و امقطعه  جفينه
صاحت يا عمي امن العطش و الله قلبنه اتفسر
صحنه  ابغيابك يا قمر و الله شملنه  اتطشر

عالمشرعه زينب لفت تصرخ يا حامي ضعني
ضيعني سهم امصيبتك يا با الفضل  ظيعني
يا با الفضل إختك أنه وسفه و لا  تسمعني
يردون أروحن لليسر قوم انهض و  رجعني
صاحت يراعي المرجله قوم الظعنه رده
صحنه يساكن كربله طالت علينه  المده