أَكتِبْ بالدموع ويّاك العهد

أَكتِبْ بالدموع ويّاك العهد…واتصيح الجروح يالمهدي مدد
🔹🔹🔹🔹🔹
يالغايبْ اسنين وآنه بهالوَضعْ…مِن وَحْشَة الليل أضْويلك شمعْ
ما ظلّت اشموع طفّاها الدمعْ…صابر والاحزان للمُهجه طَبعْ
خايفْ يمولاي ما شوفك بعد…واتصيح الجروح يالمهدي مدد
🔹🔹🔹🔹🔹
گلبك يغايب يحمِل چَم جرح…يَمفارگ أحباب بالسَم والذَبِح
دمْ دمعك اشلون عالخد ينسفح…عذّبني هالليل يا شَمس الصُبح
حزن المُعانات بالروح إنولد…وتصيح الجروح يالمهدي مدد
🔹🔹🔹🔹🔹
حاضِر بالگلوب غايبْ عالنظر…يمته يَمحبوب يسعفني القدر
وأسمع بالاخبار المهدي ظهر…صَدّگني مليت من دهرِ القهر
يا نار الفراگ مِن كل نار أشدْ…و تصيح الجروح يالمهدي مدد
🔹🔹🔹🔹🔹
كل لحظةْ إغياب مَحسوبه سَنَه…وإتخيّل اشلون أنتظرك أنه
ما غَيرْ الهموم بيّه ساكِنه…كل جرح بجفاك گلبي مَوطنه
طال البُعد طال يمته اتخلّي حَدْ…واتصيح الجروح يالمهدي مدد
🔹🔹🔹🔹🔹
بهاي الليالي حاضِر سَيدي…مجلس عزانه باسمك يبتدي
كل دمعه كل آه لجلك تنهدي…إگلوب المُعزّين كلها تفتدي
تفديك الأرواح بالعِدّه وعَددْ…واتصيح الجروح يالمهدي مدد
🔹🔹🔹🔹🔹
يا أغلى عندي من شَمّ الهَوه…مُوتي وحياتي بغيابك سوه
تظهر بيا يوم ويرفْ اللوه…يا مَن ظُهورك لجروحي دوه
ما كافي ترحال هسّه بيا بَلَدْ…واتصيح الجروح يالمهدي مدد
🔹🔹🔹🔹🔹
يا بَهجة الروح أقسِملك قَسَم…كل هاي الأنصار تكتبلك نعم
تدعي اللّه ويّاك تتْثَبّتْ قَدَم…يا صاحب الثار يا راعي الشيَم
يعجّل ظهورك والباري شَهَد…واتصيح الجروح يالمهدي مدد