أربع غوالب بين الكتايب

أربع غوالب… بين الكتايب… خلقوا  عجايب

موجوده ساحات الوغه و هالشاهد أصدق  شاهد
تشهد  بحق الأربعه صامد أمض من صامد
من  بعد  دور التضحيه دور الخلود  الواعد
البذل  النفوس إتوجهوا للموت واحد  واحد
بالهمه  صاحوا…  بالحومه طاحوا… مثل الكواكب

أربع  كواكب  أصبحت قاع الحرب  مثواهم
نثرت  جدايلها الشمس و إتكورت  وياهم
و  إنكدرت إنجوم السمه و تنحب على فرقاهم
اتجفنوا من داري الترب و إتغسلوا بدماهم
إعيون الطوالع… تجري المدامع… الفقد  الأطايب

ما من مجره بالسمه و بالأرض ما من  ذره
إلا  و عليهم تنتحب إبدم يجري ويه  العبره
اشلون أربعه و طاحوا جثث صرعه اعله وجه الغبره
هاي الدموم الطاهره انطبعت ابعين  الزهره
إتنوح  الوديعه… يم الشريعه… إبدمع  النوايب

إشعندها الوديعه أم الحسن يم النهر  وشبيها
قالوا  تدور عالقمر و إجفوفه لمقطعيها
ما  حضرت  أم الأربعه يم جثته  لموذريها
لاجنها  حضرت  فاطمة اتعوضها و إتواسيها
الكافل تغيب… بالبضعه تلهب… نار  المصايب