أربع ابدور إذخرتهم الساعة الشده ردتهم

أربع ابدور إذخرتهم…الساعة الشده ردتهم
ربيت و تعبي ما ضاع

أربع أركان الدنيتي شيدت بيهم  داري
و آنه أصبحت شتلت سهر و اتربوا  بأسماري
عنهم  فلا لحظه غبت عاشوا إقبال  أنظاري
لو  صحت آه اتسارعوا و ارتقبوا  أخباري
أربع ابدور المعالي…و العمر بيهم حِلالي
إشبول  إنزلوا من إسباع…ربيت و تعبي ما  ضاع

أربع إسباع و قدمت زهرة حياتي  إلهم
تتخطه بحدود العزم و اعيوني  تتمثلهم
و  آنه الجنت من الزغر فوق الجفن  أحملهم
عاشوا  ابساحة مهجتي و جنت آنه أعيش  ابظلهم
اتربوا ابحجر الإطاعه…و من علي افنون الشجاعه
هالخبر للعالم شاع…ربيت و تعبي ما ضاع

ابجامعة حيدر طالعوا درس العزم و الهمه
و  الأسد لو خلف شبل يحمل صفاته و  رسمه
و مثلوا زود المرتضه و حملوا صموده و  عزمه
و اتعلموا معنه الوفه و حفظوا اعهود الذمه
اتعنوا  الساحة حربهم…و عالدرع شدوا قلبهم
صرخة عزمهم مذياع…ربيت و تعبي ما ضاع

ابذيج الليالي الزاهره اسهرت الليالي اعليهم
ما  جنت أدري امن العمر أضمن حياتي  بيهم
لاجن  قلت  هالأربعه للزهره راح  أهديهم
و  احسين أعز منهم عليّ و لجل الحسين  أفديهم
و الخبر منهم لفاني…ضحوا وورفعوا كياني
دمهم لبو اليمه إنباع…ربيت و تعبي ما ضاع

ما همني من جاني الخبر عباس صابوا عينه
و لا همني من قالوا وقع و اتقطعت  جفينه
ناشدت وش عدكم خبر شربت الماي  سكينه
لو بقت بالطف ضاميه و اتنادي عمي  وينه
و اسمعت ليث المنايه…طايح ابدرب  السقايه
و  ظل الأمل بالأسماع…ربيت و تعبي ما  ضاع

ما  يهم  فقد الأربعه و عالصبر قلبي  امطبع
لاجن الصوب مهجتي و خلاني أجري  المدمع
من اسمعت سبط النبي طايح ابذاك المصرع
ذاك  الوكت دمعي جره و بنيان عزمي  اتصدع
عالبنين  اعيوني  تربي…حسين أخوهم هوه قلبي
للقلب  صاروا أضلاع…ربيت و تعبي ما ضاع

أرد  أنصب اديار الحزن و أدري الدهر  خيبني
و  ظليت أنوحن و انتحب يحسين وينك  يبني
روحت بنيني الأربعه هالخبر ما  صوبني
لاجن  خبر موتك صعب صك مهجتي و شيبني
أنصب اديار المصايب…أرد أنوح و ما أعاتب
متلمني يحسين القاع…ربيت و تعبي ما  ضاع