آنه أمك يالرحت مني و اقطعت ظني

آنه أمك يالرحت مني …. و اقطعت ظني….يبني يا الأكبر

رحت  للحومه عن عيني و نظر عيني إلك  يربي
دليلي  يندعي  منك أريد اوليدي يا ربي
دليل الوالده يعلم بإبنها لو ألم مر  بي
و  أنه من طول اغيابك علم بالفاجعه  قلبي
و  نفذ  صبري …. و فرقت خدري
و الدمع يجري …. عالجثث أفتر
يا  ضي عمري …. و لوعتي  ابصدري
مندهش فكري …. يبني يا  الأكبر

أحوم اعله الجثث و أنحب بقية حيلي بجدامي
و أقله القلبي لا تجزع يقلبي اتحمل  آلامي
دليلي ابكل أمر حسب لجن ما يدري  قدامي
أشوفك عالثره يابني ذبيح امعفر و دامي
شفت  جسمك …. سابح  ابدمك
ويلي يا السهمك…. بالقلب  أثر
صحت يمك …. هاي أنه  أمك
شنهو لمألمك …. يبني يا الأكبر

طريح  و ما تجاوبني يا روحي اتحيرت بأمرك
شنهو  يبني انضهد حيلك يا من عمري على  عمرك
أجول ابناضري الجسمك و أشوف اسهام  لبصدرك
حملتك ردت أضلعها شفت مطلعها من ظهرك
الجسد دامي …. و خابت أحلامي
إبني جدامي …. بالثره  امعفر
على  آلامي …. منخفض هامي
ضاعت أيامي …. يبني يا الأكبر

أنوح  و  مندهش بالي صحت و اتغرغر  الدمعه
صدق  ميت علي إبني و أنه حيه و عليه  أنعه
عمت عيني رحت مني صدق رايح بلا رجعه
دقوم  انهض و لو مره نريد الصوتك  انسمعه
علي يبني …. لا  تعذبني
ما تجاوبني …. و أبقه أتحسر
القدر ذبني …. دهري حاربني
لا تدولبني …. يبني يا الأكبر

يا شبه الهادي يوليدي دليلي ابفرقتك هايم
أعوفك لا تظن يابني وحيد و عالترب نايم
يلكبر  ما تظل وحدك يجي عبدالله و  القاسم
و  أقيم النوح أنه و أمهم يا من رحتوا ابغدر  ظالم
تذكرني …. لو رحت  عني
و انته متعني …. للنبي الأطهر
رحت مني …. و انقطع  ظني
ما يخف وني …. يبني يا الأكبر