رب العرش وياك

رب العرش وياك …. و المصطفه  وصاك
لو فتنه تظهر …. إصبر يحيدر…. و المصطفه وصاك

يا  حيدر النص الإلهي أمّرك …. عكس القواعد يمشي كلمن أخرك
إنته انصرت بارينه و الباري إنصرك …. و إعله العناصر كلها فضل  عنصرك
و  انته الجبل حفظ اليقين ايصبرك …. كل العواصف لو تهب  متغيرك
گلبك  جبل صفوان …. يا قلعة  الإيمان
عالشده تگدر …. إصبر يحيدر…. و المصطفه وصاك

إنصرت النبي ابكل غزوه و ابكل معركه …. و ابكل فتوحاته العظيمه اتشاركه
ابسيفك نفوس أهل الضغاين هالكه …. و هذا الجهود الهادي جان  ايباركه
مات  النبي و عندك إجه الدين اشتكه …. أصبح غريب و فتره مرت حالكه
ابموت النبي المختار …. دين الله ركنه إنهار
مثلك تأثر …. إصبر يحيدر…. و المصطفه وصاك

ابفگد  الرسول الدنيه أضحت مظلمه …. بيك السنن لاذت و دين الله  احتمه
و  ابتدت  غارات المحن متراكمه …. غاره بأثر غاره و غضب وجه السمه
و اهنا بدت تحجي و تلوم اللايمه …. اشلون ابوجودك ينغصب حگ  فاطمة
و  اعله الضلع شتگول …. هم گلك المرسول
لاون تكسر …. إصبر يحيدر…. و المصطفه وصاك

لا دامت الدنيه عگب سيد الأمم …. ريت الوجود اتوسد ابحجر  العدم
عالباب  لجل  الدهر من صال و هجم …. بيمن يحيدر گلبك إنشد و إحتزم
اشلون  اگدرت تتحمل احمول الألم …. و إگبالك الزهره الضلع منها  انهشم
لاشك  يبو الأشبال …. صبرك يهز  إجبال
فضلك تقّدر…. إصبر يحيدر…. و المصطفه وصاك

الهادي ابوفاتك خيرك يا با الحسن…. و قلك يا حيدر بيدك إزمام الزمن
لو تشهر السيف و يرد دين الوثن …. لو تصبر و تحفظ شرف هاي  السنن
إنته  وصي الهادي بالسر و العلن …. ما غيرك ابهاي الوصيه  مؤتمن
بهالحاله يا كرار …. حفظ السنن تختار
هذا التقرر …. إصبر يحيدر…. و المصطفه وصاك

عشرين عام و خمسه قارعت الصبر …. حين استقر بيدك يبو احسين  الأمر
هبت رياح الفتن و مضات الغدر …. من كل حدب هاجت و كل  كتر
هاي الاجت بالهودج اتهيج الجمر …. و هذا اليطلبك ثاره من وقعة بدر
يا قاعده و قانون …. بالمعركه ايفرون
من عندهم احذر …. إصبر يحيدر…. و المصطفه وصاك

لو  ما غبار الحسد و الغش و الجهل …. ما جان بالبصره تشب حرب الجمل
و  فتنة  الكبره الصارت اتثير الجدل…. ابصفين من رفعوا مصاحف  عالأسل
هاي  الفتن للأمه تلبس يا عمل …. و يا جرح من قلبك يا بو احسين  اندمل
اصبر يا داحي الباب …. يوم القيامه  احساب
هالزمره تحضر …. إصبر يحيدر…. و المصطفه وصاك