خلص عمري نفذ صبري

خلص عمري نفذ صبري          نفقد صبري خلص عمري
* * *
يا با الحسن احسب للأجل لحظات
من حزني ذبل هرش الدليل ومات
فات الأمل عن عيني يحيدر فات
شيفيد العمر من يگضي بالحسرات
يهل دمعي اختلف وضعي          ابغدر دهري خلص عمري
* * *
دوران الليالي ايدور بالاوهام
وبدار الغرب احسب اليوم بعام
گالولي الصبر لهل الصبر أيام
والأيام صارت بالغرب اعوام
انهدم عزمي كثر همي          الدمع يجري خلص عمري
* * *
عمري خلص بالهم والحزن والنوح
واليفگد حبيب الگلب وين ايروح
هذا الگلب بالغربه يلم اجروح
يمك يا علي يمك تركت الروح
على جروحي غفت روحي          يشب جمري خلص عمري
* * *
كلشي احسبت من عمري يداحي الباب
بس فرگتك ما چنت احسب الها حساب
بدموعي الك اكتب احروف اعتاب
عنك مبتعد لا ذنب لا أسباب
اسهرت ليلي انهدم حيلي          انگطع عذري خلص عمري
* * *
مصيوب الگلب يا با الحسن مصيوب
هذا الصوت ويه النايبه مصحوب
صار المثل بينه يا علي مضروب
واشحال المحب لو فارگ المحبوب
كثروني انگطع ظني          واظن تدري خلص عمري
* * *
وين أنطى الوجه يا بعد بيتي وين
انصابت عيني بفراگك يضي العين
روحي اتصوبت يا علي بسهم البين
حيرني الدهر بالغربه يا بو حسين
ظهر عتبي ابجمر گلبي          اندهش فكري خلص عمري
* * *
اصرخ بالحزن وينك يحامي الجار
لا محبوب ظلل ولا وطن لا دار
بدموع الجفن ما تنخمد هالنار
لحد يالحضرت الشدد يا كرار
يسليني دمع عيني          انشحن صدري خلص عمري
* * *
ناري نار هظمي هظم دايي داي
شوفة حضرتك صارت أمل دنياي
هالمحنه الإجث گطعت حبل رجواي
طالت يا علي شنهو البصر والراي
ابدمع ودي انجرح خدي          انخسف بدري خلص عمري