يبن حامي الحميه أودعك هالمسيه وداعاً يا حسين

يبن حامي الحميه…أودعك هالمسيه …وداعاً يا حسين

إتلاقه  الأسد  و إخت الأسد زينب و العيون  إتشوف
و القمر لم نفسه و نزل ما بين الأثنين إيطوف
يسمع  حجي إيذوب الصخر يجرح دليل  الملهوف
أم  الشجاعه و بت علي هاللحظه مر بيها  الخوف
باجر  وين…ما  تدرين…عمرج تنتهي  آماله
حته الليل صاح الويل…حين الشاهد الحاله…وداعا يا حسين

كل ونه بأطناب الخيم منها الشمس تتكور
و يسعر حنين الوالده إبحيره و حزن  عالأكبر
باجر علي إتقطعه الزلم و إعله الأرض  يتكور
باجر  جفن عرش السمه إيهل عالوجن دم  أحمر
و  الآهات…عدنه  إتبات…و إبنج يغرب  إهلاله
حته الليل صاح الويل…حين الشاهد الحاله…وداعا يا حسين

مر إعله رمله أم الحزن مو حزن ضربات إسهام
خبرها وي وجه الصبح تنطبر هامة  جسام
خبرها باجر تحترق ما تظل للعيله إخيام
خبرها باجر لو يمر يحدون بيكم  للشام
و  إتشوفين …دمع العين… يهل و إدموعه سيّاله
حته الليل صاح الويل…حين الشاهد الحاله…وداعا يا حسين

آيه كريمه إمنوره تنبض ابقلب القرآن
منقوله عن صوت الوحي حرمت قتل  الرضعان
باجر  إبقوس الفاجعه و نبلة حليف  الشيطان
عبدالله ينزف منحره و ينذبح أصغر  قربان
سهم  البين…صاب حسين…ذبه الأصغر  أطفاله
حته الليل صاح الويل…حين الشاهد الحاله…وداعا يا حسين

الليل  مدبر و النجم يلفظ بقايه  الأنفاس
و  الفجر  مقبل و الكدر ينشر سواده إعله  الناس
باجر  عله  إجروف النهر تنطبر هامت  عباس
و  ينهدم  سورك يا علي و خدر الحراير ينداس
يالمشهود…رايه و جود…و يمينه إمفارقه إشماله
حته الليل صاح الويل…حين الشاهد الحاله…وداعا يا حسين

باجر ذراع الفاجعه يرمي السهم  عالعتره
باجر محمد يشتكي للباري حيرة أمره
تنطبر  هامت  حيدره و ينكسر ضلع  الزهره
و حسين يوقع عالثره و الشمر يقطع  نحره
صدر حسين…صدر الدين…ما ترحمه الخياله
حته الليل صاح الويل…حين الشاهد الحاله…وداعا يا حسين