نطّبر نطّبر

نطّبر نطّبر … و انادي يا حيدر…و الملگه بالمحشر

يا  حيدر كل عاشق مغرم يكشف عن حبه  ابتعبير
منهم للمحبوب ايكله حبك بالدلال  ايسير
و منهم يهدي اورود الخله ابعنوان الحب و  التقدير
و احنه اعشقنه احسين الضامي ترجمنه الحب  بالتطبير
نطبر  و انطحي ابدمنه و نتعذر من  هالتقصير
و الواجب يا حيدر … للضامي نتوذر…و الملگه  بالمحشر

و الطف يا والينه جريمه اتعددت حد  الطغيان
نحذر عدوانك تطويها و تخفيها ابلوح النسيان
نحذر جالبيعه اينكروها يالوالي أشرار العدوان
لا  بد هالعالم يفهمها و يرددها بكل إلسان
باجر بالدم انجددها و انضحي الما عده  وجدان
و  الواهم يتبصر … و للحق ما يتنكر…و الملگه  بالمحشر

يا  حيدر  نطبر هامتنه و ما نهتم بالقال و قيل
خلها اتقول الوادم بدعه و احنه نجاوبها  بتفصيل
جن بحسين القوم اتذبحه و بجثته اتمثل  تمثيل
جن راسه المرفوع ابرمحه يقره الآيات ابترتيل
زينب هالتضرب هامتها بالمحمل و الدم  ايسيل
و تتطبر و تتذكر … و راس ابنك و المنحر…و الملگه بالمحشر

نتطبر و انجدد ذكره يا حيدر من عام العام
و افرض نخمد نار امصابه من نتطبر فوق الهام
و  افرض ننسه امصاب الأكبر و انسينه امصيبة  جسام
لاجن عالمفطوم ابنبله يا جرح اليشفه و يلتام
باجر  عبد  الله ايذبحونه و اعله اجفوف احسين  اينام
و  يا  قلب اليتصبر … لو شاهد هالمنظر…و الملگه بالمحشر

يا حيدر و بيوم العاشر يسعر بينه الدم و يفور
من نسمع بحسين امخضب عالغبره و تبراله الحور
و  من  ننظر خيمة والينه جن ننظر بيت  المعمور
و المهد البلخيمه الكعبه و الأطفال اعليه  اتدور
مرعوبه اتلوذ ابمرعوبه و مذعور ايلوذ بمذعور
مذعوره امن العسكر … و من ناره تتوجر…و الملگه  بالمحشر

و المحشر يالسامع منظر لا يتوصف لا ينقاس
موقف و الوادم مجتمعه ابحيره و مكتومه  الأنفاس
تتنطر محكمة الباري بين الأمل و بين الياس
و لن هاتف يهتف بالمحشر غضوا بصركم  يالناس
و تحضر بين الناس الزهره و بيديها اجفوف العباس
و  تشفع  لك من تحضر … يالدمك يتفجر…و الملگه بالمحشر

لابد  نرجع يم الضامي لا بد يم احسين  انعود
و نتعاتب يا محله المعتب بين الفاقد و  المفقود
و  انقله ابفقدك يالغالي ماذبينه اثياب السود
حاضر غايب يا والينه بقلوب أحبابك موجود
جرحك بينه و ما ناسينه و الطبرات اعلينه  اشهود
و يم قبره نتطبر … و هالمشهد يتكرر…و الملگه  بالمحشر