من عله ظهْر المَحامِل صوتي لرْض النجف واصل

من عله ظهْر المَحامِل…صوتي لرْض النجف واصل
وينه حلّال المَشاكل…ما يجينه

يبويه للنجف مشبوح طَرْفي…شوَصِّف حالتي او شيْفيد وصفي
أحس درْب السَّبي شلْته اعله چتفي…او عنَّك ما أظن هالحال يِخفي
إذا وجهي اِنكشف يسترني جفي…أفَصِّلك بعد لو هذا يكفي
عِجبه سيف الله او قَناته…ما يجي ايْخلّص بَناته
و احنه حاطتنه الشِّماته…يدري بينه

بناتك يا علي ربّات اِلحْجال…مدْري اشلون تركب هزِّل اجمال
يچتّفها عدوها او تعلم الحال…تَرِف معْصَمها لاچن خشنه اِلحْبال
او معاها راس أخوها ابراس عسِّال…يميل اوياها لو شاف الظعن مال
راسه يدري عگبه ظعنه…لاچن امْراعي وظعنه
عالرمح بس اعله ظعنه…امخلّي عينه

اليتامه امن البچي اتجرَّح جفنهم…فرات او دجله ظل يجري ابوجنهم
من الناگه هِوَوْ يا بويه چنهم…تگول أوراق طاحوْا من غصنهم
احترت و اشلون راح أبره لظعنهم…ثمانين او أنا المسؤوله عنهم
چم طفل فرْ بالبَوَادي…هايم ابوجْهِا او ينادي
او چم طفل تحت العَوادي…ساحگينه

تعال إلحگنه يا حامي الحميَّه…أمَشّي اعليك ضلع اُمّي الزچيه
إذا سوط الشِّمر ينزل عليَّه…أشاگف بيش مو مچتوفه اديَّه
چم طفله اعله طفله اتلوذ بيّه…و إذا سكّت حميده اِتْوِن رقيه
هاذي تسكِت ذيچ تنحب…او كلها تصرخ عمَّه زينب
حيدر الليث المجرّب…وينه وينه

يا من تحضر الشِدّات يا حيد…يوَعد الله ولا تِخلف مواعيد
گِلّي اشلون وحدي أگطع البيد…او عليّه الشام دربه اطويل و ابعِيد
او عليلك يا علي امطوّگ بلحديد…بيده الجامعه او مغلوله للجيد
حبِل واحد منَّه يبدي…او ينتهي يابويه عِندي
بي صبح زنده اويْه زَندي…امچتِّفينه

يمن نجّيت يونِس من بطن حُوت…يموت الموت عجبه ايعطّلك مُوت
مهو إنته اللي بالكلفات منعوت…اشلون ايفوت منّك يا علي الفوت
يزيد ابمجلسه و ايْصيح بالصوت…عليّه خلّو بنت المرتضى اتفوت
صاح زينب دخّلوها…او سمِّعُوها شَتْم أبوها
اهيَه ويَّه اعيال أخوها…تعتنينه

يبن عم التظلّل بالسَّحابه…دگوم امن الگبر و انفض تُرابه
عجيبه اتعطّلِت عنّي يَيابه…او حجاب الله أنا او هتكوا حجابه
او عگب ذيچ المعزّه و المَهابه…يبويه تالي نزلونه ابخرَابه
بالخرابه كلنه نسِوه…و الدّهر بينه اِشسوَّه
ياعلي اليِسْوَه او مَيِسْوَه…ايْصد علينه