زينب تلطم اعله الراس

زينب تلطم اعله الراس …. و اتنادي يمهر  حسين
أسمع هطل بالميدان …. خيالك تقنطر وين

لزمت بيديها إلجامه و قامت تون و  اتنشده
مالك  تسحب اعنانك و عنك مايله  العده
يمكدر وين أخويه حسين خليته اشبب وحده
اشعندد موجب إقبالي …. و تتهضم على  حالي
تراك          امردت          دلالي
أسمع بالمعاره اصياح …. و العسكر فزع  صوبين

من  شفتك عليّ مجبل قلبي انخمش و  اتطير
أسمعك تصهل و تعول لاجن بالعويل الشر
سولفلي  أخيي وين عنك وقع و  اتقنطر
إمشي اوياي دليني …. و لعند حسين  وديني
اشما لك ما تحاجيني
تدق ابحافرك يمي …. و شابح للخيم  بالعين

يمهر حسين حاجيني قاصد هالخيم ليها
و لسبالك زلم ظلت تحشمها و تنخيها
غير  الحرم و الرضعان ما تم هالخيم  بيها
بس واحد بقه وجعان …. جسمه امن المرض نحلان
ابوه ابخطة الميدان
علينه  ضاعت أخباره …. و لا نندل طريجه امن امنين

مدري اشعوقك عني و هاي الخيل إجت  لينه
ايخاف  اتفرهد اخيمنه و تفرهد عز  العلينه
خذنه اوياك للميدان و اعله حسين  دلينه
و كل الحرم تبعنه …. و بيهن للولي  اتعنه
سمعن    من    بعد    ونه
و  صوت  ايصيح يا زينب …. يختي طالعه  لاوين

سمعت زينب و ركضت و قامت تركض النسوان
لمن وصلن الحومه لكَنه اموسد التربان
يلوج امن العطش و يصيح و جق جدي النبي  عطشان
يا هالوادم درحموني …. شربت ماي دسقوني
بعد  ما شوف  بعيوني
و  قامت  عالوجه تلطم …. و تخمش زينب الخدين

تدنت زينب و قامت تجلب اجروح  البصدره
لنها اتشوف المثلث طالع من حرز ظهره
قامت  عالوجن تلطم و تسجب زينب  العبره
تقله  ويل قلبي اعليك …. يخويه هالسهم  ماذيك
تلوج اعله الثره امخليك
و هو اللي قطع حيلك …. و جاسم جبدتك  نصين

زينب جاعده يمه و تجلب اجروح  البجبده
يحيدر جان مقصدها تطلع السهم و اتشده
لن  الشمر يا كرار لازم مرهفه بيّده
و لمن وصل قامت ليه …. و تتوسل يحيدر  بيه
تقله الها الحرم خليه
ما تم بيه كتر سالم …. تحط سيفك يمكدر  وين