يمته يشع نورك يبو صالح علينه

يمته يشع نورك يبو صالح  علينه
تبني المراقد الأربعه برض المدينه
يوم الذي نلقاك…نبني القبر وياك…برض  المدينه

يبو صالح مته بدرك يشع ضيه و بعالمه إينور
بقيع  أجدادك  أمسه يا وسف أظلم و بوحشه  القبور
الحمام  إنحسده من يرف جنحه و إعليهم  إيدور
يزور إقبور أيمتنه لجن إحنه ما نقدر  إنزور
هذي رساله من المحب يبعث سلامه
مو  عالورق  يكتبها بجناح  الحمامه
يالمهدي نترجاك…نبني القبر وياك…برض المدينه

نعم غايب يبو صالح لجن أدري ابعينك  تشاهد
إبمثل سطح الأرض صارت ألف وسفه إقبور الأماجد
عجيبه إشقد صبر عندك يمن جفه البتاره  غامد
و عله إفراقك بجت العيون و أولها إعيون  المراقد
ابهاي المصيبه يعجز يسولف لساني
جن  هدموا  الكعبه إبهدم ذيج  المباني
دمع  الجفن  حاجاك…نبني القبر وياك…برض  المدينه

يمن حيفه يعيش إوياه كل لحظه و ما ينسه  حيفه
و  مثل  عينه جرح قلبه عليهم ما يوقف  نزيفه
مته إنشوفك يبو صالح تشيد هالقبه  الشريفه
و ترفع للحسن قبره و بجفوفك تبني  مضيفه
تبني مضيف المجتبه يالمهدي بيدك
و  بإسم الحسن غلمانك إنصير و  عبيدك
و  أنادي  عد عيناك…نبني القبر وياك…برض  المدينه

أمل  عدنه  و على هذا الأمل صرنه ننتطر  إسنين
إبشوفة قبة أجدادك يبو صالح تتكحل  العين
تشوف الناس للغرقد تجي إبلهفه إبفوج  الملايين
و  عقب هدمه يصير المرقد ابطيبه جن مرقد حسين
برض المدينه سيدي تبني  المزارات
وسطه  الصحن بأربع و اثمن  منارات
يبن  الحسن و اهناك…نبني القبر وياك…برض  المدينه

إعيون الوادم إتاني يغايبنه الطله البهيه
و  عينك عالبقيع إتشوبح إبعبره صبح و مسيه
يبو  صالح و إذا تظهر فلا تنسه لب  القضيه
إبدخولك  للمدينه إتراوي أحبابك قبر  الزجيه
قبر  الزجيه لو ظهر تتعنه الصفوف
و  ندرٌ  عليّ لو وصلت أزحف لها  إزحوف
نتعنه  تحت  إلواك…نبني القبر وياك…برض  المدينه