من مشت عني الضعينه

من  مشت  عني الضعينه …قلبي عذبني إبحنينه
الفرقاهم ما أقدر…أنساهم ما أقدر…قلبي عذبني  بحنينه

هلي لمن مشوا عني و بعد هي إصورهم إبعيني
و  قطعت الشوف من عدهم صفكت إيساري  بيميني
رجع  بيه  حنين الروح ذكرت أيامي و إسنيني
لني إبلا حمه ووالي و صده الذكره  يحاجيني
أحجي  و المدمع أسيله…هلج راحوا يالعليله
ما أقدر أتصبر…أنساهم ما أقدر…قلبي عذبني  بحنينه

أطاوع  صبري عالفرقه لجن مني جزع  صبري
عليله و حيل ما بيه شسوي إبروحي ما  أدري
عمري  الأوله  لوعه عقب أهلي شلي  إبعمري
القلب عذبني بالونه يريد إويه الضعن  يسري
إبيا أمل قلبي أصبره…ينحب و خانقته  عبره
و أتنطر الأكبر…أنساهم ما أقدر…قلبي عذبني بحنينه

يقلبي  لازم إتصدق غده شمل العشيره  أشتات
بعد لمتهم الجانت ترد لا ما أظن هيهات
ظل إعله الأمل عايش و إتذكر زماني  الفات
و ظل إبحسرة الملقه تون و إتسله بالدمعات
من  شفت  دمع العقيله…قلت سفرتهم  طويله
أتصور  المنظر…أنساهم  ما أقدر…قلبي عذبني بحنينه

يقلبي إرحم إبحالي وواسيني عله  الفرقه
إذا ما تقطع الونه جفن للنوم  شيطبقه
أنشدك و إنت باصرني إذا ما صح أمل  ملقه
وين  انطي الوجه و امشي و أهل مثل أهلي وين  ألقه
و  الله ما أقطع دمعتي…و لا حنيني و لا حسرتي
إبفرقاهم  أتمرمر…أنساهم  ما أقدر…قلبي عذبني  بحنينه

لون  يحجي القلب جا قال إشلون أنسه هلي و إرباي
إلي  عشرة وفه إوياهم تنسه الشجره فضل  الماي
قبل جانوا نبض وياي ما أقدر أبطل  إبجاي
و  لا أقطع أمل منهم واعدني يجي  الوفاي
قمر هاشم يرجع إلنه…جايب أخبار من  أهلنه
ما  قالوا تتأخر…أنساهم ما أقدر…قلبي عذبني بحنينه

يقلبي قالوا الغايب من يبطي العذر  وياه
أقولن ما قدر يرجع ما أقول الوعد  ينساه
جود و عايله و رايه كلها إموزمه  بحماه
و  الله  يا قلب عمي صعب ما ينحمل فرقاه
صورته  تبقه إبخيالي…هيبتي و فخري و  دلالي
ما  ظنه  يتعذر…أنساهم ما أقدر…قلبي عذبني بحنينه

أبقه بالدمع و النوح لمن ترجع أحبابي
و  ما يضحك بعد سني إله إبوجه  غيابي
و يشفه إبردة إضعوني و تبرد جمرة إصوابي
لاجن  حقي من أعتب سلوة حزني  بعتابي
أدعي  الباري يردهم…عيني مشبوحه  الدربهم
أذكرهم و أتحسر…أنساهم ما أقدر…قلبي عذبني بحنينه