آنه الهضمها البين

آنه الهضمها البين …عنها الأهل  ماشين
إشحال  العليله ابلا ولي و إتهل  العيون

جانت  إظنوني تقلي إوياي بويه إتدللي
إمشي  وي ضعن الفواطم و إنت تبره  المحملي
تدري  يا بويه عليله إشلون أظل ابلا ولي
وين  ناوين إبضعنكم وين عني يا  هلي
وحدي  تخلوني…وياكم إخذوني
أنحب وراكم يا هلي مالومه  تدرون

أوحشت دارك عليه ليلي بالآمه يجن
تسعر النيران بيه للأهل دلالي حن
ليش يا بويه عفتني ما خذتني إويه  الضعن
ويلي ما هزك نحيبي شفت دمعاتي جرن
هالجن عليه الليل…وحدي و دمعتي إتسيل
و  الروح  وياكم مشت تبره  للضعون

ساكنه البيده و أناطر و المدامع دم تهل
بلجن إبضيف و تجيني و ترجع إضعون  الأهل
حنت  البيده  الحنيني و الصخر بيها إنذهل
لا  وصل  مرسال أبويه لا إلي طارش  وصل
يا  بويه  بأصعب حال…و أنتطر المرسال
مشبوحه عيني إعله الدرب بلجن  تردون

تسري نار الألم بيه فوق لوعات  الدهر
فرقتك طالت عليه و لا بعد عندي  صبر
من  عسن جتني المنيه إخلافك إشيسوه  العمر
بس ردت بيدك يبويه من ينزلوني  القبر
أظلم  عليه  الدار…دلالي تسعر نار
أبقه وحيده إمرمره يا أهلي  لترضون

عاشرت  ليلي  المواجع من مشيتوا  الكربله
إبكسرت  الخاطر  دليله و المدامع  سايله
مهده  عبدالله  يناغي جنه يمي  اتخيله
سلوتي و غاب إعله عيني و الدليل إيحن  إله
و أتذكر الأيام…صارت حلم و أوهام
ما  ترجع  أيام المضت ما ظن  ترجعون

لوعتني إهنا يناعي إمنين قلي  جيتك
عن هلي يالمجبل أنشد حن دليلي و جيت  إلك
يا خبر عندك تقلي يالتنوح  إبعبرتك
إرحم إبحالي عليله و جيت ليك اتوسلك
تدري القلب لهفان…و أنشد عله  العطشان
كل ساع تاخذني و ترد يالناعي  الضعون

جيت  أخبرج  يالعليله هلج ظلوا  عالثره
إتوذروا  فوق  الوطيه و الأجساد إمعفره
حسين  ضامي إمسلبينه و شمر قاطع منحره
و  عمج  إجفوفه رميه قمر سبع  القنطره
زينب  سبيه إتنوح…يمها الولي مذبوح
و إتصيح نومه إعله الترب ما بيه  تدرون

و  شفت  عبدالله ذبيح شال دمه إعله المهد
ضامي من قطعوا وريده إمن العذب لا ما ورد
يمهم الأكبر رميه و يمه جسام  الولد
و بالخيم نار و عليل إيلوج و الحيل  إنضهد
و  بلوعة  السجاد…من شاهد  الأجساد
و  إيصيح نومه إعله الترب يا سادة  الكون