يا أمل كل الحياره

يا  أمل كل الحياره…خادمك رهن الإشاره
جيتك  و دمعي إيتجاره …واجب إعليه  الزياره

موعد إمصابك دعاني ما قلت ما بيه  جيه
جيت المديون إجيتك أرد أوفي إشما عليه
منك إشلون إعتذاري و الوفه عندي  سجيه
و آنا أتأمل شفاعة أمك الزهره  الزجيه
خادمك  آنه التعرفه…ما بده إبيوم إعتذاره

أمي  نذرتني الخدمتك سيدي من  الولاده
قلبي البحبك تربه ما ضعف يوم  إعتقاده
مرقدك  لمن أطوفه من ضمن فرض العباده
و إنت معروف إبعطاءك تنطي للزاير  مراده
و  آنا أريد إمرادي منك…بالقلوب آخذ بشاره

من شفت هيبة مقامك طولي يم بابك  حنيته
أدري يمك عالي قدري و الكرم عندك لقيته
و إسمك اليحمل صفاتك من بعد لمن قريته
جيت  أقدم لك عزائي يجرح الدمع  البجيته
و من دنيت أشتم ضريحك…نزلت إدموعي بغزاره

من  عشت لوعت مصابك خاطري و قلبي جرحته
ما جزه إثلاثينه عمرك و بشراب السم  ختمته
قمت  أحس دمعي اليجاوب كل سؤال اللي سإلته
هّون  إمصابك عليه إمصاب الحسين  الذكرته
و  إذكرت قصة رضيعه…و عيلته الراحت  يساره

آنا  ما ريدن أقارن لو مصاب الطف أذكره
أدري  كل  عين إعله جدك للحزن تاخذها عبره
و إبقلب كل شيعي تسعر للحشر موجوده  جمره
و يا ذبيح إبلحده قبله وسدوا طفله إعله  صدره
و  ينتظر  مهدي العداله…ياخذ من أعداءه  ثاره

يا  أهل  بيت المصايب أنسه و أذكر يا مصيبه
يا دوه الممكن ينفعه جرح اليهله طبيبه
جم نجيب إنحز وريده و ثقله تلطم جم نجيبه
و المصيبه التدمي قلبي زينب الظلت  غريبه
و  عالنهر  كافل ضعنها…لا يمينه و لا يساره

يا إمامي و لسه زينب عد بني أميه  أسيره
عاودوا  نفس  السبوها إلمن الناظر تديره
وين اليقول آنه شيعي ما أخاف و عندي  غيره
عن قبر زينب يحامي من حقد جيش الجزيره
زينب  إبولية  نواصب…تنتظر زود  الغياره