الفقرة الأولى :

أتى ضعن السبايا قم وجدد حزنهم في الأربعين

يا حسين جيتك يا ذخر عزي ودلالي عندي شكاية ورد أفصل لك أحوالي

جيتك بخبرك باللذي صار وجرى لي ماعندي دمعة گرحت بعدك ياغالي

بسولف لك عن الكوفة وشمامتها وعن الشام العدوة وعن حقارتها

والأسواق والبلدات ومجلسها مثل سوم العبيد أشلون فعلتها

يوليي الشام ماينذكر طاريها طرب وفراح بس لخبار وصلتها

ومن حيدر علي الثارت دركتها يا خوية مزينه ومشهورة رايتها

بحچي لك عن كربلا والمجزرة وعن كفيلي الراح سبع الگنطرة

شفته مرمي عالنهر وتذكره مگدر أوصف لك ياخوية المعذرة

يا هو مشهد صعب أوصف منظره بكل لحظة وكل وكت أتذكره

العمد والسهم والدم الجرى شاخص بعيني وگلبي يبصره

شفت ذرعان وچفوف موذره وحاطته گوم العدي مستبشره

جيتك يا حسين..يا نور العين وگلبي نصين..دامي ومفطور

جيت بدمعات..خوية ولوعات وعلى الصدعات..گلبي مفطور

جيت بحرم وأيتام

من سفرتنا للشام

ولا واحد جانا إستگبلنا ولا شكرنا السلامة

وبيرگنا الزاهي نكسنا وجيناكم يالنشامى

نخبر للزهرا بحالتنا ونشكي ليها الظلامة

الفقرة الثانية :

ودي أضمه بشوگ وتمدد بكتره واكحل عيوني بتربته وفيض نحره

ودي أنشده واعتبه مهجة الزهرا واجدد الماتم على گبره بحسره

أنا ودي أوص مصرع ابن أمي وبث لوعات گلبي واشتكي همي

أظل ويا فوگ الگبر مدفونه يسليني ويخفف لوعتي وغمي

أحاچيه بغبن وعيونه تبرى لي وگله يا سهم حصل مثل سهمي

أنا يابن أمي ما عفتك على كيفي غصب عني مشيت ودمعتي تهمي

واحنا گادونا غرايب لليسر فوگ هزّل والدرب صعب وعسر

لو نشدنا الحادي يزجرنا زجر زلم حادينا وگايدنا شمر

لو نخيناهم نشوف إلما يسر ولا گلب منهم يحن وينكسر

آه يا گايد محملي ويش البصر ماني متعوده على ضيم وسفر

أيتام ونسوه..مضروبه بقسوة وسوطه يتلوى..ورّم لمتون

مذعورة تنادي..وارتاع إفادي وانشد يا حاد..مشينا بهون

خويه الگوم ظلام

لا مابيهم أسلام

الله لو شفت الخياّله يوم إلهجمت عالصيوان

سلبونا الگوم وظلمونا وشبّوا يا خوية النيران

بالبر الشاسع فرّينا ولحگونا الگوم العدوان

الفقرة الثالثة :

والله يا جابر لا تسايلني عن حسين من أذكر الفجعة أموت وتهمل العين

أگضي نهاري والمسى باحزان وونين وگبال عيني كربلا تمتثل كل حين

شعدد لك وشحچي عن مصايبنا تفتت للصخر هالنخوة وتكسره

شماتة وذلة في ولية أعادينا مچيدة وياعظمها وصعبة هالسفرة

يا جابر ولهدم ركني ودوهنتتي وخلى گليبي دامي ملهب جمره

أشوف الراس كدام الضعن يزهر على راس الرمح وعيوني تنظره

آه يا جابر وشبعت ضيم وقهر شلون ضيعة والگلب مني نفطر

فگدت أحبابي حنى مني الظهر ونور عيني من وگع يم النهر

خرت لبدور..والدم بحور يجري ويفور..فوگ التربان

مگطوعه الروس..إبحر لشموس والخيل تدوس..رضّت لبدان

شفت إلما شافت عين

ما گّصر بين البين

والله يا جابر من أسمع عماتي بحسره تنادي

يا عمة سلبوني المگنع ونتستر بالأيادي

يا حيدر بويه ما تفزع وترد عنا الأعادي