هاي الحزينه الوالهه .... متوجهه الرب السمه

بلهفة قلبها تندعي .... بصوت النعي .... و متألمه

أم البنين الأربعه .... رفعت إيديها للدعه

مثل الحمامه الحايم اعليها النسر .... مثل الكِطه تايه و ما عنده وكر

أم البنين بليا راي و لا فكر .... مرعوبه طلعت قبل مطلاع الفجر

لا عدها رجوت أمل تقعد تنتظر .... لا تقدر اتصبر قلبها و تستقر

ما عدها غفوه من الحزن .... حته الجفن.... منها ذبل

نار الهضم متوهجه .... لا ظل رجه.... و لا ظل أمل

لمن لفتها الفاجعه.... رفعت إيديها للدعه

معروفه هاي الحاله عد كل أم ولد .... ايفطر قلبها الإبن لو منها انفقد

اشحال اللي تفقد أربعه اشتصبر بعد .... لحد يلوم القلب لو منها انمرد

أربعه اشلون أربعه و كل واحد أسد .... ذخرتهم اليوم الكلايف و الشدد

كل منهم بعزمه انوصف .... بيه انعرف.... معنه الوفه

نالتهم اجفوف القدر .... لا من خبر .... منهم لفه

أمهم بقت متلوعه .... رفعت إيديها للدعه

كفلوا بنات الوحي و شدوا راحله .... رسموا ضعينه و قطعوا افجوج الفله

تركوا أرض يثرب عقبهم قاحله .... و أخضرت بدمهم مفاوز كربله

أمهم بقت عنهم خبر تتأمله .... حته النسيم اليمر عنهم تسأله

ولهانه تسحق عالجمر .... حته الصبر.... منها خلص

الدنيه بوجهها امعبسه .... صبح و مسه.... هم و غصص

بكسرت نفس متضرعه.... رفعت إيديها للدعه

ضي البصيره طفته ارياح السهر .... وش يجبر الخاطر لون غصنه انكسر

بهالحاله ظلت تحسب أيام السفر .... افراق البنين اعليها كل لحظه بشهر

رفعت ايديها و صاحت بنوح و قهر .... ليك الأمر فوضته يا رب البشر

اشقالت بعد من اندعت .... و اتضرعت.... خل نستمع

نسمع دعاء الوالده.... هالفاجده.... اتصب الدمع

بنار الجفون الدامعه.... رفعت إيديها للدعه

صاحت يا رب العرش رد لي لهفتي .... و ارحم دمع عيني و نحيبي و حسرتي

يا ربي مو للأربعه اتهل دمعتي .... أبجي اعله سبط الهادي زهرة دنيتي

الوادم تظن لولادي هاجت ونتي .... لا والله لحسين اللي ساكن مهجتي

احسين ابني ساكن بالقلب .... فقده صعب.... ما ينحمل

أولادي فدوه إله .... و أتأمله .... يعود و يصل

آنه الحزينه الضايعه.... رفعت إيديها للدعه

أنسه البنين الأربعه كل الجره .... من أنظر الطفله العليله امكدره

هيه اعله عبدالله تحن تتذكره .... و آنه اعله والدها جبدتي موجره

كل وحده من عدنه بهضمها امحيره .... و اليفقد الغالي بعد شيصبره

دمعي العليله فاطمه .... يسفح دمه .... الفقد الطفل

و آنه اعله سبط المصطفه .... متلهفه.... دمعي يهل

هالطفله مثلي امصدعه.... رفعت إيديها للدعه