من كربله رحنه ايتام للكوفه و الكتر الشام

و من يدري بينه هاليوم إجينه

هاي الضعينه الجانت ابين أطياب و ابهيبة الوليان جانت تنهاب

لن الدهر خلاها ما بين أجناب ايباريها جتال الأخو و السلاب

و أفتر دهرنه هالشكل صرنه

راحت وجوه الوليان و رحنه بشماتت عدوان

و جارت علينه هاليوم إجينه

هاي اختك اتناديك و اسمع يحسين خدها عله اتراب تجري العين

تدري تقلك جنت يبن أمي وين هاليوم إجيت القبرك و جيتي امن انين

امن الشام إجيتك ابقبرك لقيتك

عقبك يخويه ابيا حال يا الكلفتني بأطفال

و اميسرينه هاليوم إجينه

حدك اوياي من اوقعت من مهرك حدك اوياي السيف من قص نحرك

حدك اوياي الخيل داست صدرك و من بعد هذا الناس خلها اتخبرك

حرقوا اخيامك داسوا أيتامك

ما بين نار و دخان نتراكض ابها الوديان

و امسلبينه هاليوم إجينه

يا حسين لو مو شايفه ابعيني اشصار ما جنت أصدق باليسولف أخبار

جن احنه مو عايلة بيت الكرار سلبوا نهبوا بالخيم وجوا نار

آخر فعلهم جابوا هزلهم

و باليسر حاديهم صاح عفناكم ابغير أرواح

عنكم مشينه هاليوم إجينه

جرحتنه الكوفه أشد من الشام الشام الها ثارات ابعهود الأصنام

الكوفه شجاها و سببت هالآم عاشت اسنين ابيت أبونه و أيام

اتناست ربانه اشعملت اويانه

جابتنه يم ابن ازياد و الحبل من السجاد

واصل ليدينه هاليوم إجينه

امن ابدال ما يستنكرون الحاله وقفوا يقصفون الروايه اقباله

اذبحنه لحسين ابكربله و ارجاله احرقنه الخيم جبنه سبايه اعياله

و احنه ابيسرنه محد نصرنه

كلها ابيسرنه شمات و لا فضل أثر بالذات

انسمعك حجينه هاليوم إجينه

إلهم حرم ويانه جو أخدوها و ابنات حيدر باليسر عافوها

و هالعايله همَ الذي ايعرفوها متحجبه و بخيال ما شافوها

اشبيدي اعله لخوه تسمع النخوه

خليتكم عالتربان موته كهول و شبان

و رحنه ابسبينه هاليوم إجينه

رحنه اليزيد الجمع اعلينه الناس ناس الذي ما عدها ذرة إحساس

كل ساع لن بيده يراوينه راس راس لحسين و راس أخونه العباس

ابديوانه صرنه و بيده أمرنه

لا والي عندنه ايحاجيه و شما حجه ايرد اعليه

وليه انولينه هاليوم إجينه