تترك الجثه الشريفه .... لو تعوف أهل السقيفه .... ابروحتك تصبح خليفه

يا علي شوف .... إلمن اتعوف

الليله شارت عالنبي اجفوف المنيه .... و انت يا حيدر أخو الهادي ووصيه

إقبالك اجنازة أبو الزهره رميه .... و محد اتعنه الدفن سيد البريه

بالسقيفه انجمعت أعيان الرعيه .... و انت شنهو اتقرر ابهاي الرزيه

الدنيه كلها بإنتظارك.... تنتظر منك قرارك.... يا علي اشصار إختيارك

ننشد ابخوف .... إلمن اتعوف

يا علي الباري امنحك تاج الإماره .... ابصارمك دين النبي اتحدد مساره

للسقيفه لو رحت عندك صداره .... تاخذ ازمام الخلافه ابكل جداره

و لو عفتهم غيرك اينول الوزاره .... و هو يصبح حاكم ابأمرم و قراره

و انت لو شخصك تأخر .... غيرك اعلينه ايتصدر....و كل شخص منهم يحيدر

راسم اطيوف.... إلمن اتعوف

تدوي ظلت يا علي الصرخه الحزينه .... ابكل رحاب الدنيه مو بس بالمدينه

انت ذاتك طاهره و حره و امينه .... ظلت الآخر نفس ويه نبينه

انت نفس المصطفه و ساعد يمينه.... ما تعوف اجنازة الهادي رهينه

تترك إجنازة رسولك .... من أجل منصب ينولك....هذا لا مو من أصولك

و انت معروف.... إلمن اتعوف

من سمات المصطفه الهادي سماتك .... تختلف عن غيرك ابجوهر صفاتك

لحظه ما عفت الرسول ابكل حياتك .... اتعوفه وكت الدفن ما تقبلها ذاتك

فقده سجر بيك جمرة نايباتك .... و ابمماته صرت تتمنه مماتك

ينغصب حقك وسافه .... و الدهر بيك اعترافه....انت أكبر من خلافه

و هذا مكشوف.... إلمن اتعوف

يا علي البرج الحزن عينك تراقب .... و ابفقد سيد الرسل شفت العجايب

انت تستقبل عصر ريح النوايب .... و غيرك استقبل تهاني بالمناصب

ألف وسفه و حيف يا ليث الحرايب .... ايصير قلبك هدف لسهام المصايب

شيعت نعش النبوه .... و ادفنت كنز الاخوه....يا علي و قلبك تلوه

ابحزنه محفوف.... إلمن اتعوف

شيعت طاها ابقلب ينفح شهامه .... من عقب مدفن نعش جسم الكرامه

ارجعت تنحب يا علي الدار الإمامه .... و منزلك خيم يبو احسين ابظلامه

الهادي راح و عترته أمسوا يتامه .... عله امصابه العالم اتغير نظامه

تصرخ إلسان الفجيعه .... راح أبو الزهره الوديعه....يا علي و جفن الشريعه

دمعه مذروف.... إلمن اتعوف

هذا قلبك يا علي اتسجر لهيبه .... و ما قدر جفنك يطفيها ابنحيبه

هذي أول فاجعه و أول مصيبه .... يبو احسين القلبك الطاهر تصيبه

الزهره أمست عقب والدها غريبه .... و أمست الدنيه ابحزن وحشه و كئيبه

الليله يا ليث المعارك .... الحزنك اعالم يشارك....و نزلت الليله الملائك

الدارك اضيوف.... إلمن اتعوف