يوم أربعينك أَلَبّي دعوتك...مشايه يحسين أجي لزْيارتك

تأمرني مولاي أذوب بخدمتك...يا مالك الروح يهيبةْ أُمّتك

ملهوف ملهوف...يبن عقد الوله

مشّاي مشّاي...أروح الكربله

كل المواكب بعدهه اعله الوعد...تدريهه كل عام إلك تكتب عهد

خيرك غطاهه يمن خيرك مدد...وفّايه ويّاك عليهه الله شهد

تتلگه كل ضيف هله وميّةْ هله

مشّاي مشّاي...أروح الكربله

خليهه لجْدام فرض هذا وِجَبْ...بس بطريقك شفت راحه التعب

عمري الخدمْتَك يبو اليمه إنْوهب...وهواي الاسباب أريد أذكر سبب

شفت اعله دربك تعب عمري حِله

مشّاي مشّاي...أروح الكربله

أرفعلي رايه وأحس صوتك إلي...تشد حيلي مولاي تگلّي ما يلي

عون اللهّ ويّاك ومحمد وعلي...والروح يحسين تعبهه ينجلي

وكل مشي الايام يصير اشْمَسْهله

مشّاي مشّاي...أروح الكربله

شفت الكرامات أنا بهذا الدرب...يوم أربعينك يسهّل كل صعب

كل بيت بيتي أبد ماكو غُرُب...چي إنته محبوب توافي كل محب

عنّاي عنّاي...عشگ گلبي امْتَله

مشّاي مشّاي...أروح الكربله

بعيوني يحسين الك صورة عشگ...بعون اللّه مايوم يغالي نفترگ

دفتر حياتي أريده ينطبگ...واني ابطريقك مثل شمعه أحترگ

والروح والروح...شفتهه إمْدلِلَه

مشّاي مشّاي...أروح الكربله

للباري أدعي آلهي أتوسّلك...ينطيني توفيق أجي وأوصل إلك

مولاي يحسين مُناي إمواصَلَك...وتگلّي روح الحبيب إيْسجّلك

ممنون ممنون...الك يبن العُله