من دَمّي هاي اللّيلة حَنّوني...وَيّة الرِماح وْياكُم إخْذوني

دِنيا وْ بَلاكُم ، يَهلي ما تِسوة...رايِد أموت ، بهالأرِض فِدوة

مو حِلوة زَفتي هْنانة مو حِلوة...فوگ الرِماح بْ دَمعة زِفّوني

لَمَّن دَريت بْ مَعرَكة عَمّي...غِيرة أبوية فارَت بْ دَمّي

ما هَمْنِي عِرسي و آني كِل هَمّي...يم الحُسَين تْغَمِّض عْيوني

رايِد ابوية الليلة يِتباهة...وْ مَتروسة جُثتي سْهام يِلگاهة

هاي البَغاهة و التِمنّاهة...ايْهوّس عَليهة مِن يِذبحوني

بِعيوني هاي اللَحظة مَرسومة...من المَهد بجفوني مَضمومة

هالعِرِس حِلمِي ، و هَالوِصَل يومة...خَلّوني أحقّق حِلْمي خَلّوني

راح أهجِم اعْليهم مِثل جَدّي...و شحَدّة كِلمَن يوصَل لحَدّي

و اصرَخ يَسيفي بهالرُگَب وَدّي...لِحْسين ، بَلكي ايْطيِّب ظنونِي

عُمري اهدَعَش ، و بسِيفي ما دارِس...بس مِن بَطِن أُمّي اطْلَعِت فارِس

خَلّاني ابويَ اعلة البَخت حارِس...مِن صُغري ، أمَّنْ سِكنة بمْتوني

مَحلاهة لَمَّن أَهلِيِ وْناسي...يْزفّوني واني اعْلَة الرُمِح راسِي

ساعَتهة ما يِتوصَّف اِحساسي...مْلوِّن الدِنيا و مِنخِطِف لوني