❁ (1) ❁

چنت وياي من تمشي...عسكر أشعر بصفي

انظر للأمام وبس...أبد ما ألتفت خلفي

لسوي عليك سيل دموع...لحد ما يوصل لچتفي

يخويه اليفگد اخوانه...چثيره تصير عدوانه

يبو فاضل رحت وآنه

انهض إو أوگع وانخاك...چفك طاح من چفي

ما بيه انهض يا ضي عيني...چفينك كسرن چفيني

❁ (2) ❁

ما يكفي عليك النوح...ولا يكفي كسر ظهري

وحگك من صحت خويه...طلع دخان من صدري

يخو زينب بعد ما اشوف ...وين الخيم ما ادري

تراني الدرب ضيعته...يخويه الظمى ولا انته

تگرب جيشهم شفته

واشوف سيوفهم لمعت...كلها تباوع لنحري

والكسروا ظهري بعباسي...سهله اعليهم گطعة راسي

❁ (3) ❁

اليشيل الماي بجفوفه...ويشمره لخاطر الخوه

يستاهل ابوس ايده...ويسوه چلمة الفدوه

منو عنده مثل عباس...بالدنيا فقط هوه

عجيبه يلومني اللايم...بوني والدمع ساجم

واليفگد گمر هاشم

حتماً ينحني إبمشاه...ويجر النفس گوه

حاچيني لزينب شنگلها...وتموت بموتة كافلها

❁❁ ابوذيات :-

تطشرنه وبعد شيفيد .. يالماي

وحگك ما يحمله الجبل .. يالماي

شلك عندي وخذت عباس .. يالماي

الهوه والماي گطعوهن عليه

❁❁

وينچ يا سهام البين .. ظهراي

شفت اعله الشريعة انجوم .. ظهراي

شلون انهض وانه مكسور .. ظهراي

طحت والسيف يوگع من اديه

❁❁

شتظن گطعة چفوفك .. ما شلني

اجيت أركض ولكن .. ما شلني

وحگك عينك أجدامي .. ما شلني

الثرية والثره انهدمن عليه

❁❁

وحگ الصاح ابنها وجف .. لبنها

وحال العطش ما بينه .. لبنها

انحنيت عليك حنو الأم .. لبنها

واحس ضلع البتول انكسر بيه

❁❁