زينب هالليله مولدها .... زينب و الفخر من عدها

نالت علمها .... من الزهره أمها

من الزهره أمها .... نالت علمها

هالليله محفل صار.... و استبشرت كل دار.... فوق الوسيعه

فرحتنه بالاقطار.... و اتلاوحت أنوار .... نهج الشريعه

و انرسم بالأنظار .... مولد شرف أسرار.... بنت الشفيعه

جدها النبي المختار.... والدها حامي الجار .... أمها الوديعه

زينب نعجز نوصفها .... زينب و الباري شرفها

مصدر شيمها .... من الزهره أمها

صوت المعارف صاح.... بالعليه كلمصباح.... هاي الولاده

من عالم الأرواح .... بارينه بالأفراح .... بشر عباده

زينب أمل وضاح .... مولدها كوكب لاح.... نور و سعاده

من الباري عدها اوشاح.... طيب ووفه و إصلاح.... همه و إراده

زينب و المصطفه جدها.... زينب و الوصي والدها

و أخذت عزمها .... من الزهره أمها

مولدها أسعد يوم.... طير السعاده ايحوم.... سحره و جماله

زينب فرحها ايدوم .... فوك القلب مرسوم .... نهج العداله

بيها الشعر منظوم.... و احروفه جنها انجوم .... جو الرساله

زينب بحر معلوم .... منها اكتسبنه اعلوم .... طيب و أصاله

زينب بالشده تحمينه .... زينب شمعة ليالينه

جوهر قيمها .... من الزهره أمها

زينب شرف آمال .... بالعفه و الآصال.... ينفح عطرها

بكل مكرمه و إجلال.... تضوي عله الأجيال .... شعلة بدرها

تمشي بأجل منوال .... ما ينطر إعله البال .... موقف صبرها

تصبر بأصعب حال.... ما تقدر الأقوال.... توصف قدرها

زينب بارينه رافعها .... زينب بالعليه موقعها

يزهر اسمها .... من الزهره أمها

مولدها بالأذهان.... راسم صحف إيمان .... نور المكارم

من عدها كل حك بان .... صارت شرف وجدان.... ضي العوالم

زينب صفت عنوان.... عشناها بالعرفان.... و الباري عالم

بيها الشرع ينصان .... من عدها للإحسان .... ظهرت علايم

زينب لهل العلم زينه .... زينب عالحكَ تدلينه

كوكب هممها .... من الزهره أمها

زينب علم منشور.... للحق صفت دستور .... واسع مداره

هالشمعه بالديجور .... تزهي و تشع و اتنور.... شمس الصداره

إلها الشرف مذخور .... بيها العدل معمور.... و بكل جداره

مولدها بدر النور .... لاح و صبح مسرور.... بأعظم بشاره

زينب كوكبها شع نوره .... زينب للعلم مذخوره

يزهي نجمها .... من الزهره أمها