منيتي جانت زفافك و أفرح بعرسك يغالي

و ليلة الزفة مصابك ما خطر يبني اعله بالي

أذكر الماضي يجاسم و أسرح بحسبة خيالي

يا ربه اسنيني و حناني و يا تعب سهر الليالي

إذكر حنان الربتك...بين الجوانح ضمتك

أمك القضّت عمرها تنظر الطولك يبنها

و كل صباح و كل مسية شوفك اتكحل جفنها

تنتظر ساعة أجلها بيدك اتفصل جفنها

تنزل اوياها القبرها و انت التقوم بدفنها

أمك يجاسم رادتك...تحضر قبرها ابدمعتك

عالصبر يالناشدتني من شفت دمعاتي تجري

حقي بساعة وداعك لو نفذ يوليدي صبري

قلبي ما طاوعني يبني و انت زين ابقلبي تدري

من بعد عينك يجاسم ساعه ما ينفعني عمري

عمري قضيته ابلهفتك...أحسب و أتاني زفتك

يبني يا جاسم زماني ظالم و ما عنده رحمه

والدة و يعرف شعور و قاسي ليش اعليه حكمه

يالرحت عني و عفتني وكتي ما يخطيني سهمه

لو صفق جنحينه قلبي اضلوعي ما تقدر تلزمه

و من اعتنيت الحومتك...قلبي أخذته بروحتك

لجموا اجروحي ابوداعك فززوا حسرة عذابي

عالوكت لو يبني أعتب ما أظن ينفع عتابي

من بعد ليلي الحسبته و انطفت لهفة حسابي

و ليلة الزفة يجاسم لني متقبعة بمصابي

بالعطر فاحت وردتك...ليش أنحرم من شمّتك

من رحت للحومة يبني و القلب وياك أخذته

اعظامي تتراجف عفتها و حيلي يا جايم هدمته

و من بعد ساعه يجاسم دامي نحرك يبني شفته

وسدت طولي اويه طولك و قلبك القلبي حضنته

شيب الكثر من حسرتك...خضّبته من دم رقبتك