عله اقبور البقيع ابحسره مرينه...و بريحة علي و فاطم توطينه

و إنطوف...جنة عدن...و إنشوف...جنة عدن

توضينه بعطر تفاحة الرحمان...و حل فرض الصلاة و ما سمعنه آذان

ما خلونه نشتم ريحة التربان...خافوا من عطر فاطم رياحينه

ما خلونه نوصل للحسن و إنزور...خاف اتطيح دمعه و ننتفض و إنثور

خاف ايمر عليهم طف مثل عاشور...حسبوا عالحسن خطوات رجلينه

هاي أحقادهم ما تنتهي الأحقاد...يا ملة عبيد اتحارب الأسياد

خافوا بينه تصعد غيرة السجاد...و الحارب يزيد إيحط عزم بينه

و الباقر أبد ما رادو انمر بيه...و لا نوصل ضريحه و بالعسر ندعيه

ما يدرون باجر من ذهب نبنيه...و إنرد الزمن لو يوم ردينه

ما يدرون نور الصادق المعصوم...لو هدموا ضريحه ابعلمه ما مهدوم

عدهم كارثة و يوم القيامة إيقوم...إذا بإسم النبي المختار صلينه

ما رادوا أبد بأم البنين إنطوف...خاف امن القبر نتعلم المعروف

خاف إنشوف رايه البايعتها إجفوف...نذكر وقفت العباس لحسينه