يا شباب و ما تهنيت بشبابك

خاب ظني...آه يبني

يا شباب و ما تهنيت بشبابك

يا ورد أوراقه منثوره ابعطرها

اشجابها الطف كربله او يا هو النثرها

جيت اسألك بالله علّمني اعله سرها

اشلون يمه الوره نشتمها بنحرها

مثل أوراق الورد جسمك تنثر

و انت أول ورده قطعوا منها منحر

هاج حزني...آه يبني

خاب ظني...آه يبني

يا شباب و ما تهنيت بشبابك

يمه خدك ينجرح من نسمة الريح

اشلون أشوفه و عالترب منه الدمه يسيح

لو صحت وياك روح الوالده اتصيح

و لو طحت من المهر قلب امك ايطيح

انت قلبي و المهر يوليدي لضلاع

و طاح قلبي من طحت يا يمه عالقاع

اوياك ذبني...آه يبني

خاب ظني...آه يبني

يا شباب و ما تهنيت بشبابك

يبني عرسك فصّلت ثوبه بيديه

جنت أظنك تقبله من أمك هديه

اشعجب عفته و اخترت ثوب المنيه

و عفت حضني و نمت يبني اعله الوطيه

ياللي تارك حضني و اعله القاع غافي

نام يا يمه عسه نوم العوافي

اتعوف حضني...آه يبني

خاب ظني...آه يبني

يا شباب و ما تهنيت بشبابك

يبني يا جاسم عليك اعيوني ذابت

عني ساعة من رحت ارموشي شابت

الابتسامه من غبت يوليدي غابت

و لا عمر عقبك حله و لا دنيه طابت

يبني وياك ادفنت كل أمنياتي

و موتي عندي اخلافك ايشابه حياتي

اوياك خذني...آه يبني

خاب ظني...آه يبني

يا شباب و ما تهنيت بشبابك

بالعرس يا ريت يا وليدي اتهنه

و ريت مو بالدم يضي عيني اتحنه

عفت جنة عرسك و خابت الظنه

و أصبح بعينك ييمه الموت جنه

جنت اتراب قبري انت تهيله

و نعشي ييمه عله اجتافك تشيله

ابيوم دفني...آه يبني

خاب ظني...آه يبني

يا شباب و ما تهنيت بشبابك