أنشدك يالذي بدنياك ...عليك الدهر لم جوره

اقصد سيد محمد ...و طوف الحضرته و زوره

طب الحضرته و زوره و اطلب حاجتك منه

سليل الهادي بو جعفر معروف الفضل عنه

قبّل عتبته و انحب يمه و ثقّل الونه

و اشكي الحال و ادموعك عله الخدين منثوره

عله الخدين منثوره ادموعك لو شكيت الحال

يقضي حاجتك و اتشوف اشلون ايحقق الآمال

و حتماً من تصل لحماه اهمومك لو تصير إجبال

كلها يشيلها عنك و روحك ترد مسروره

اقصد سيد محمد سليل الهادي أبو الطيبات

اطلب حاجتك منه عنده تنقضي الحاجات

سيد محمد اهوايه اله بيوم الشدد وقفات

و اله شارات بين الناس عند الخلق مذكوره

اليحلف بيه جذب حتماً يسطره و ما تظل آثار

المعاجز عنده أبو جعفر جثيره اتحير الأفكار

عن هاي المعاجز دوم تسمع تلقي للزوار

تشوف الحضرته الوادم هدايه تجيب و انذوره

روح و شاهد ابعينك بنذوره الصحن مشحون

مرضه التوصل الداره كلهم لو لفوه يشفون

و حته الخايف يأمنه يفرع كل قلب محزون

و ياخذ حاجته و يرجع بإذن الله اليطب سوره

يا سبع الدجيل الناس كلها اتقول من تنخاه

و هو بهذا اللقب معروف روح انشد عليه تلقاه

جم سارق قطع جفه غير البقت مسموره

معاجز سيد محمد جثيره و أبد ما تنعد

و حته الخالفت دينه اله بهذا الفخر تشهد

يشبه عمه العباس و حقك سيد محمد

شاراته تهدم ابيوت عنها أخبار مشهوره

و أريد اليوم من عنده يهدم ابيوت هالعدوان

العله قبة علي الهادي تعده و هدم البنيان

يزلزل من تحتها القاع و يشب اديارهم نيران

و هاي المعجزه تبقه لجيل الجيل مذكوره

هذي طلبتي منه أقله و القلب مهموم

و آنا بمجلس التأبين عليه مدمعي مسجوم

بين الما قضه منهم غير امقطع و مسموم

و غير مقيد و منغل ذيك القضت منحوره

يمولاي القضيت اليوم عليل ابدار غربتها

روح اعليك مالومه و ثجيله اعليك حسرتها

عليك ادموع شيعتكم تكت جروان عبرتها

و تظل اقلوبنه الفرقاك ليوم الحشر مجموره

و انت السيد المبرور ينجل الهادي بو جعفر

ببلدة بلد هذا اليوم صابك سهم المقدر

امصابك بجّه الهادي يويلي و مدمعه اتفجر

قام و غسّلك بيده و جبدته اعليك مفطوره

لجن ما لقاه مذبوح و خذه اعله الثره امعفر

مثل حسين لمن شاف حال ابنه علي الأكبر

قعد عنده و يصيح ابصوت عله الدنيه العفه و كبّر

من عظم المصيبه و صاح يمه اصوات مقهوره

حين حسين شاف ابنه بهذا الحال يمه طاح

يويلي اتمدد بكتره و يصفج قام راح ابراح

ينده قام يا زينب علي يختي امن ايديه راح

تعالي اوياي خل نبجي عله اوليدي الخفه نوره