شيعي و أنادي... هذا اعتقادي

حب فاطمه صك الغفران

للزهره ياخذني العشق و اتولعت من زغري

أحضر عزاها ابدمعتي و بس إلها نادر عمري

باجر تجازيني ابوفه و بيديها يصبح أمري

تشملني رحمة فاطمه و تحضرني هيه ابقبري

باجر يشيعه ...هيه الشفيعه

و يحشرنه وياها الرحمن ...حب فاطمه صك الغفران

كل مجلس و ماتم حزن بضعة نبينه اتحضره

تسمع اليقره اعله الضلع تلطم و تجري العبره

و الينفجع قلبه و يون وياها من العصره

ينعرف عدها و ينقبل و اتسجل اسمه الزهره

خالد اسمها...و فاز الخدمها

و الجنه تفتح له البيبان ...حب فاطمه صك الغفران

هذا اعتقادي بفاطمه و لو أموت أظل بيه ملزوم

و أكتب وصيه ابدمعتي و حسادي خليها اتلوم

فاز اليواليها و ربح و بقلبه ما يبقه اهموم

و من عدها يتقاضه الثمن صك الشفاعه المحتوم

الزهره الجليله...حره و أصيله

قاريها كوثر للعطشان ...حب فاطمه صك الغفران

للزهره موقف بالحشر عزه و كرامه و نوماس

تتعنه و الرب العرش و ترفع اجفوف العباس

و اتنادي يا رب اسألك تشفع و تغفر للناس

و إقبالي تدخل شيعتي للجنه مرفوعة راس

و احنه ابحشرنه...ناخذ أجرنه

و كل شيعي ما تمسه النيران ...حب فاطمه صك الغفران