بويه ما أحمل مرار امصابك... ريت غابت روحي قبل اغيابك

آنا روحك و آنا قلبك فاطمه...دمعتي الفقدك أهلها من دمه

عقبك ابعيني حياتي مظلمه ...صوباني بالدليل اصوابك

رحت عني و قصت بيه النايبه...جمرة أحزاني ابمهجتي لاهبه

راح أظل امدوهنه و امدولبه...بويه و اعليه تجور أصحابك

أدري بعدك ما أكف مجره الدمع...عله هضمي القوم قامت تجتمع

بويه و المسمار ينبت بالضلع...لمن يعصرني اللعين ببابك

أدري أمرك عقب عينك ينعصي ...أدري بس الصبر منهم مخلصي

لا وصيه اليحفظوها و لا وصي...و يحرقون بباب داري اكتابك

لا ضلع يسلم و لا يسلم طفل...عله اعيوني بيده يسطرني النذل

و الهضيمه علي يجتفونه ابحبل...يوقفونه الظالم ابمحرابك

آه يبويه اشعظم هضم القلب...يمنعوني جي أنوح و أنتحب

فدك من عندي خذوها بالغصب ...شرد أقول وشحجي ويه غصّابك

قطعوا الشجره الجنت يمها أستجِن ...عفت داري و اسكنت بيت الحزن

ليلي و انهاري على قبرك أون ...سلوتي صارت ابشم اترابك

بعد ما ظل لي عقب عينك أمل ...و أنتظر يا والدي يوم الأجل

أشتكي امن فلان و فلان اشعمل...لازم اوياهم تصفي احسابك