كل غريب إيشوف بعيونه المغيب

حسره و إظنون و عذابات و حبيب

آنا يا بويه أحس كلشي غريب

حته دمعي النازل إمن إعيوني

ساعه أشوف الجود و أتخيل عميت

ساعه أشوفك لاجن إبيوم المشيت

ساعه أركض و أسمع إتقلي إجيت

و آنا أقلك ليش يالعفتوني

مره أشوفن خيل و أتعجب و أصيح

مره أشوفن معركه و إنت الذبيح

و أقصد أتعثر و أقوم و مره أطيح

مثل صيحات الضعن تانوني

لاجن ابهالمره ناديت الإجوك

جن شفت وادم غرب بويه الولوك

إقبال عيني إبلايه راسك من خذوك

و آنا أصيح إويه الولي ذبحوني

من مشيت و أيست وكت الظلام

بويه شفت النار تسعر بالخيام

و بعباية زينب أنواع السهام

شفت ناس إبليل إجو يسبوني

شفت فارس لاجن بلايه جفوف

يريد ياخذ ماي يم الشط يطوف

شفت شاطي و مشرعه و إثلث حروف

قمر عباس إنكتب بظنوني

شفت منظر مروه لكنه سريع

سهم شفته إبنحر عبدالله الرضيع

شفت منظر إنت بس واقع صريع

و خيل ريت بدالك يسحقوني