يشهر النوح آنه إمخدرة عدنان ...من شفتك بجيت و هاجت الأحزان

إبجيتك يا شهر عاشور تاذيني...عسى لا جيتني و لا شافتك عيني

أنوح و جزعيت الناس بونيني...و هضمي ما جره لا عالإنس و الجان

أنوحن طول عمري و ما أبطل النوح...و عله الضيم الحملته ما بقت لي روح

جم حيد التركته ابكربله مذبوح...حيلي إنهدم كله إبغيبت الوليان

غريبه إخلاف أخوتي ابيا وضع ظليت...وافاني الأجل ويه الأهل يا ريت

و لا عاين صورهم كل وكت بالبيت...تشب نيران قلبي و أشكي للرحمان

عفته إعله الأرض ريحانة الزهره...ذبيح إيلوج يمهم و الجبد جمره

مات ولا شرب من العذب قطره...أويلي اعله الغريب اللي قضه عطشان

للرحمان أشكي و أندب ابلوعه ...من ذاك الوكت لليوم مفجوعه

من أذكر أخويه الرضوا إضلوعه ...إبصدر حسين لعبت خيلهم ميدان

أصيح ابصوت عالي و ألطم اعله الراس...من أذكر جفيلي و هيبتي العباس

طاح اعله النهر وسفه ولوه الناس...و طاحت يسرته و يمناه عالتربان