ها يَ زينب وحّدج و الدنيا ليل .. يا غريبة و شايلة بدمعج نهر

امنين أجيبن لج يَ بت حيدر كفيل و بهالظلام امنين ادور لج قمر

المسافة بين عينج و الفرات , غيمة عطشانة و تدور ابلا مطر

ها يَ زينب طالعة بهذا الظلام ، اسم الله صاح الليل لو جدمج عثر

خطوة أجدامج مثل طير الغريب ، بين ألف صايود و جناحه انكسر

عاصفة حزنج تطخ إلها الجبال ، و انتي راسج عالي يتحدى الخطر

الليل يا زينب يطول اعلى الْ يخاف .. و انتي من كثر العتب ليلج قصر

شوفة خيالج قبل بالمستحيل ، هسة ياهو الْ جان من حقه النظر

النوم سلطان و يسيطر ع الجفون ، إلا انتي نايمة بعينج سهر

يا بحر من الألم موجاته آه ، يا وكت صار النهر يقهر بحر

ليلة العاشر عن ألف عام و تزود ، بين دمعة و دمعة نمشيها بشهر

كفّي دمعج خلي للشامت دموع .. لمّي صبرج باجر وداع و سفر

لو ركبتِ الناقة من يلزم ايديج ، مدي جفج يمكن الكافل حضر

من تعبرين الصحارى اعلى الهزيل ، ع الرمال دموعج تخضر شجر

حزنج اهْواية لجن عمرج قصير ، و آنا كل عمري لجل عينج صفر

ويّ طولج بيه قصر جرح الطفوف ، عذر ابو الغيرة اوي طولج جف كبر

ها يا زينب لا تمرين اعلى اخوج .. يموت صبرج من تشوفين النحر

سِحْقِتَه الخيل و توزع ع التراب ، خنصر المقطوع ينطيج الخبر

مثل ابوج امشي و انظري للأمام ، حيدر بصدرين يمشي بلا ظهر

يَ الْ قصدتِ اعلى النهر كلج عتاب ، هَ الله الله بكافلج من اعتذر

جفوفه ذبلن مستحى طلبن سماح ، لْ خاطر القادر اعذري الْ ما قدر

ها يَ زينب وحّدج و الله المعين .. انتي دمعة و الخصم قلبه حجر