لازمه إضلوعي بيديه...و أنخه يا حامي الحميه

قلبي يسعر ...و التكسر ميتجبر...وينه حيدر

يا علي بهمومي جيتك و ما مثل هالحيره حيره

إمن الولم جفي إعله ضلعي و طرفي الشخصك أديره

مقدر أحجي يا ولينه العبره تشرح هالجريره

يا حمانه رد سؤالي محنتي كلفه و جبيره

ساكت إنت و متكلم...و الضلع شفته تهشم

طفلي مرمي... إبدمه مدمي...إينادي يمي ...وينه حيدر

يا علي عيني إضربوها و أصبحت يالوالي حمره

ما أوجد بيها دربي و منها دم يجري تنظره

الدخل عندك يحيدر بالشدد دايم تحضره

و آنا من طاها أمانه و العهد ما ظن تنكره

حاشه تنكر هالوصيه...و إنت للهادي وصيه

لاجن الحل ...بيَّ أشعل... ناري و أسأل ...وينه حيدر

يا علي أكبر هضيمه و حرقه بيَّ وجروها

دارك البيها الزجيه و إنت موجود إدخلوها

و الحبل صار إبرقبتك و هيبتك لا ما رعوها

و البتوله من تقلهم خلو حيدر يضربوها

يا علي جم سوط إجاني...ورم إمتوني و سباني

حيره صبرك...شنهو عذرك ...و آنه أنظرك ...وينه حيدر

يا علي أنخاك و تسمع نوحي و إعتابي وونيني

و تنظر إبعينك يحيدر صدري دامي و ما تجيني

إبسكتك إمحير اشوفك و صمتك الهيج حنيني

و دمعة إعيونك جوابك جنها قالت لي إعذريني

لو عذرتك هذي زينب...تنشد و مدمعها ينصب

من إجونه...و هاجمونه...روعونه ...وينه حيدر

هذي نخواتي يحيدر إبدمعه يمك وجهتها

ردتك الها النخوه تفزع فاطمه ما عودتها

من تطلبك يا حماها إتردها و إنت إتكفلتها

و إنت خواض المنايه تشهد إحروب الخضتها

شاهده إبزودك يحيدر...كل حرب يا داحي خيبر

بابه شلته...و بابي عفته...نخوه ونته ...وينه حيدر

يم حسن ما هو بيديه لا تحشميني إبعتابج

و الله بين إضلوعي لوعه من شفت لوعة مصابج

لا تلوموني تراني شايل إبقلبي عذابج

آنا مثلج يالزجيه صوب إضلوعي اللي صابج

لو ما عودج و الوصيه...إبسيفي جا تفنه الوطيه

و ما تركتج... يالكفلتج...من سمعتج...وينه حيدر