جفوني جفوني...بعدك جفوني

ولوني ولوني...إبفقدك ولوني

ولوني و أنتحب يا بويه يم قبرك

و أريد إمن المدامع هيه التخبرك

أجر حبنه ردت من أمتك أجرك

لجن أهل الضلاله خالفوا أمرك

عجايب عجايب... شفت العجايب

مصايب مصايب... تتبع مصايب

عجايب من ظلمهم شافت إعيوني

و من أجر المحبه خابت إظنوني

فدك مني إغصبوها و منها حرموني

و حته إمن البواجي إعليك منعوني

حزينه حزينه... إبداري حزينه

المدينه المدينه... ظلمه المدينه

حزينه و ما أفارق منزل أحزاني

ورد عمري ذبل و إتغيرت ألواني

الدهر وليه ولاني و من تولاني

غدر بيه و طحت بين أول و ثاني

شبابي شبابي ...ضيعوا شبابي

عذابي عذابي ...و أجرع عذابي

أنا فرع الرساله و حجة الباري

و أسرارك يبويه جانت أسراري

إنكروا قدري الشماته و هيجوا ناري

ما راعوا مقامي و إعتنوا داري

رزيه رزيه ...و أعظم رزيه

عليه عليه... هجموا عليه

هجوم أهل الضلاله غيّر أحوالي

و دفع الباب يبقه إبذاكرة بالي

و العصره رمتني إبعتبت آجالي

إفقدت بيها جنيني المحسن الغالي

جنيني جنيني... سقطوا جنيني

ونيني ونيني... ما خف ونيني

أنا إبهاي الفواجع ضاعت أيامي

و بطيحت جنيني ضاعت أحلامي

عصر قلبي الهضم و يعدد آلامي

كسر ضلعي و جنيني و مدمعي الدامي

الليالي الليالي ...سوده الليالي

إعله حالي إعله حالي... إبجي إعله حالي